ABD Senatınıñ tış işleri komiteti çarşenbe künü Rusiyege qarşı sanktsiyalarnı quvetleştirgen bir sıra qanun leyhasına qoltuttı, dep haber ete Azatlıq Radiosı.
Laf devlet borcu bazarı, borularnıñ qurucılığına qarşı sanktsiyalar, em de Rusiyeniñ Ukraina şarqında silâlı separatistlerge qoltutqanı içün terrorizm sponsorı olğan memleket olaraq tanılması aqqında kete.
Daa soñra vesiqalar Senatnıñ bütün erkânı baqılmasına berilecek, anda deñişmeler kirsetile bile. Yañı yılğa qadar bu olmaycaqtır.
ABD Senatınıñ halqara komiteti Devlet kâtibini Rusiyeniñ terrorizm sponsorı olaraq tanılmasında qarar bermesine zorlağan qanun leyhasına qoltuttı. Al-azırda böyle memleketler cedvelinde İran, Şimaliy Koreya, Suriye ve Sudan bar. Sanktsiyalar silâ satılmasını yasaqlay ve diger memleketlerniñ ortaqlarınen banklarnıñ işini sıñırlamaqta.
Komitet, Suriye ükümetine qoltutqan Rusiye memurları ve şirketlerine qarşı sanktsiyalarnıñ kirsetilmesini belgilegen qanun leyhasına qoltuttı. Bu aqta komitetiniñ demokratı Robert Menendez içtimaiy ağlarda haber etti.
Qanun leyhasınıñ metnine köre, Rusiye vatandaşlarınıñ «Suriye ükümetine silâ almağa ya da onıñnen bağlı malümat almağa imkân bergen maddiy, maneviy ya da tehnologik yardım köstergeni ögrenilse», olarnı qara cedvelge kirsetecekler.
Cedveldeki insanlar Amerika qara cedvellerine kirsetilmeli. Şirketler de aynı sanktsiyalarğa oğray.
Bundan ğayrı, Komitet, energetik resurslarnıñ ihracı içün Rusiye borularınıñ qurucılığını maliye etken şahıslarğa qarşı sanktsiya kirsetilüvini belgilegen qanun leyhasına rey berdi.
Rusiye ükümetine yatırım yapqan, malzeme ve tehnologiyalarnı satıp yardım köstergenler sıñırlanacaq.
Şimaliy Suriyege arbiy istilâ içün Türkiyege qarşı sanktsiyalarnıñ kirsetilüvini belgilegen qanun leyhası da tasdıqlandı. Senator Menendezniñ bildirgenine köre, yañı sanktsiyalar Ankarağa «Suriyege qarşı areketleri qabul etilmeycegini», Türkiyeniñ S-400 Rusiye uçaqquvar raketa kompleksleriniñ satın aluvı ise «ruhsetsiz» olğanını köstermeli.
Qanun leyhaları ABD Kongressiniñ eki palatası tarafından tasdıqlansa, işke tüşürilecek. Bundan soñ vesiqalarnı Amerika prezidenti imzalamalı, onıñ veto aqqı da bar.
Al-azırda ABDniñ Rusiye şirketleri ve memurlarına qarşı bir çoq sanktsiyaları bar. Bunıñ sebebi Qırım işğali, Ukraina şarqındaki cenk, Rusiyeniñ ABD saylavlarına kirişkeni, Salisburyde Sergey ve Yuliya Skripallerniñ zeerlendirüvi oldı.
