Link açıqlığı

Saatnıñ esas haberi

ABD, Rusiyeni Baluhqa acele tibbiy yardım köstermesine çağıra


Volodımır Baluh, arhiv fotoresimi
Volodımır Baluh, arhiv fotoresimi

ABD Ukraina elçihanesi Rusiye akimiyetini Kreml tarafından mahküm etilgen qırımlı ukrain faali Volodımır Baluhqa acele tibbiy yardım köstermesine çağıra, dep aytıla elçihaneniñ Twitter saifesinde.

«Rusiyeni ceza izolâtorına avuştırılğan soñ sağlıq vaziyeti ağır olğan ve anda tek suv içken ve ötmek aşağan siyasiy mabüs Volodımır Baluhqa acele tibbiy yardım köstermesine çağıramız», – dep aytıla haberde.

Daa evel Amerika elçihanesi martnıñ 27-nde Qırımdaki kütleviy tintüvlerden soñ tutulğan 24 qırımtatarınıñ apis müddetini uzatmağa qarar alğan Rusiyeni tenqit etti.

Bundan evel Ukraina Tış işler nazirligi Rusiye Ukraina konsulınıñ Rusiye koloniyasınıñ ceza izolâtorında tutulğan ukrain faali, qırımlı Volodımır Baluhnı ziyaret etmek ıntıluvlarını blok ete, dep bildirdi. Bu aqta Ukraina Tış işler nazirliginiñ spikeri Yekaterina Zelenko Twitterde yazdı.

Ukraina Yuqarı Radasınıñ insan aqları vekâletlisi Lüdmila Denisova Ukraina diplomatlarına muracaat etip, Ukraina konsulınıñ Rusiyeniñ Tver vilâyetindeki Torjok şeeriniñ №4 koloniyasındaki ceza izolâtorında tutulğan Volodımır Baluh ile şahsiy körüşüvni temin etmek talabı ile Rusiye tarafına nota yollamasını rica etti.

Baluhnıñ advokatı Olga Dinzeniñ fikirince, koloniya memuriyeti müvekkilini ceza izolâtorına muntazam sürette qapatıp, qırımlınıñ şartlı vaqtından evel azat etilmesine yol bermemege tırışa.

Advokat Olga Dinze mayısnıñ 7-nde qırımlı ukrain faali Volodımır Baluhnı ziyaret etti. Onıñ aytqanına köre, o, ceza izolâtorında tek ötmek aşay ve suv içe. Advokatnıñ aytqanına köre, sağlıq vaziyeti «bayağı fenalaştı».

Aq qorçalayıcılarnıñ malümatına köre, bu sefer ukrainalı mayısnıñ 19-na qadar ceza izolâtorında qalacaq. Bu aqta koloniya memuriyeti bildirdi.

FSB, Volodımır Baluhnı 2016 senesi dekabrniñ 8-nde tuttı. FSB hadimleri Volodımır Baluh yaşağan evniñ çardaqında 90 patron ve bir qaç trotil taş tapılğanını bildirgen edi. Baluhnıñ imayesi ve aq qorçalayıcıları onıñ Ukrainağa qoltutqanı içün repressiyalarnıñ qurbanı oldı, dep tüşüneler. Onıñ evinde Ukraina bayrağı bar edi.

Kreml kontrolindeki Qırım Yuqarı mahkemesi ukrain faali Volodımır Baluhnıñ imayesine cezası müddetiniñ ğayrıdan baqıluv muracaatını red etti. Kreml nezaretindeki Qırım Yuqarı mahkemesi Volodımır Baluhnı 4 yıl ve 11 ay umumiy rejim koloniyasında qalmasına ve 10 biñ ruble (tahminen 4 biñ ğrıvnâ) para cezasını ödemesine üküm etti. Faal eki cinaiy iş boyunca tevqif etildi.

2018 senesi martnıñ 19-nda Volodımır Baluh açlıqqa başlağan edi. Bir aydan ziyade bir şey aşamağan Baluh Arhiyepiskop Klimentni diñlep, kisel içmege, peksimet aşamağa razı olğan edi. Daa soñra mahküm etilgen ukrain faali açlıqnı vaqtınca toqtatmağa qarar aldı.

XS
SM
MD
LG