ABD Ticaret nazirligi Rusiyeniñ Ukraiynağa tecavuzı sebebinden Rusiye ve Belarustan olğan 120 teşkilât içün ihracat sıñırlanmalarını tayin ete. Vesiqa ABD Federal registriniñ saytında peyda oldı, yayınlanması aprelniñ 7-ne planlaştırılğan.
Cedvelge mudafaa, aerokosmik ve deñiz sektorı ile bağlı teşkilâtlar kirdi. Olarnıñ arasında: Öptika ve fizika ölçeme Bütün Rusiye ilmiy tetqiqat institutı, Moselektronproyekt, "Zvezda" gemi yapıcılığı zavodı, Jukovskiy adına merkeziy aerogidrodinamik institutı ve digerleri. Bundan ğayrı cedvelge Belarus KGB-niñ "Alfa" bölügi, Gömel vilâyet tcra komitetiniñ İç işler idaresi ve Belarus Cumhuriyetinde İİN İç ordusı.
Vesiqağa köre, "bu qurulışlar ABD-niñ milily telükesizliginiñ ve tış siyasetiniñ menfaatlarına qarşı areket etken". Amerika akimiyetiniñ bildirgenine köre, sanktstâlar cedveline kirgen teşkilâtlar litsenziya olmadan ileri amerika teznologiyalarını alamazlar.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3enufiq6nhnir.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
