Amerika Birleşken Devletlerinde Rusiye cermayınıñ italâtını yasaq ettiler. Bunı martnıñ 8-nde ABD prezidenti Joe Biden bildirdi.
"Men yañı sanktsiyalarnı ilân etem. Biz bütün cermaynıñ ital etilmesini yasaq etemiz. Yani, Rusiye cermayı ital etilmeycek", - dedi o.
Bidenniñ aytqanına köre, bu qararğa eki fırqa da qoltutqan.
"Em cumhuriyetçiler, em demokratlar bunıñ yapılması kerek olğanına açıq-aydın qoltuttılar", - dep qayd etti o.
Aynı zamanda ABD prezidenti, Vaşingtonnıñ Avropadaki ortaqları aynı sıñırlavlarnı qoyıp olamaycaqlarını qayd etti.
"Biz, Birleşken Devletler, kerçekten energetik resurslarnıñ ihracatçılarımız, şunıñ içün başqalarınıñ yapıp olamaycaq adımlarını yapa bilemiz. Olarğa (avropalılarğa – muar.), Rusiyeniñ energetik resurslarına tabiligini köz ögüne alsaq, daa uzun müddetli adımlar etmek kerek. Putinge basqı etmek içün taqımlarımız birleşti", - dedi Biden.
O, bu adım ABD-niñ özü içün masraflarğa sebep olacağını ayttı, amma "azatlıqnıñ mudafaası masraflarnı da köz ögünde tutqanı" aqqında sözlerini hatırlattı. O, bu adımnıñ Amerika içün benzinniñ fiyatına tesirini azlaştırmaq içün er şey yapacağına söz berdi.
Ukrainağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete. Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrainağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
