ABD Rusiye tarafından Qırımnı ilhaq etmek ıntıluvnı iç bir vaqıt tanımaycaq ve "Qırım platforması"nı destekleycek. Bunıñ aqqında noyabrniñ 10-nda Vaşingtonda imzalanğan yañartılğan Ukraina-ABD Strategik işbirlik hartiyasında yazıla.
"ABD Rusiyeniñ Qırımnı ilhaq etmek ıntıluvını tanımadı ve iç bir vaqıt tanımaycaq ve halqara uquqqa, şu cümleden BMT nizamnamesine de sayğı esasında Donetsk ve Lugansk vilâyetlerinde Rusiye tarafından idare etilgen silâlı çatışmanıñ diplomatik yolnen çezilmesi içün, şu cümleden Normandiya formatı da, halqara ğayretlerge tam destegini bir daa tasdıqlay", - dep yazıla vesiqada.
ABD-niñ Ukrainanıñ "Qırım platforması" formatını yaratmaq i qullanmaq ğayretlerini desteklegeni haber etile.
"Qırım platformasınıñ Ortaq beyannamesine uyğun olaraq Rusiye tarafından Qırım işğaliniñ gumanitar ve telükesizlik aqibetleriniñ yoq etilmesi içün halqara ğayretlerniñ koordinatsiyası içün", - dep yazıla Hartiyanıñ metininde.
Noyabrniñ 10-nda Ukraina ve ABD yañartılğan Strategik işbirlik hartiyasını imzaladılar.
«Qırım platforması»
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
