ABD, Qırımnı işğalden qurtaruv platformasını qurmaq içün Kyiv ile işbirligi yapmağa azır. Bu aqta ABD işlerinden Ukrainada vaqtınca vekâletli olğan Kristina Kvin oktâbrniñ 26-nda Ukraina Tış işler naziriniñ birinci muavini Emine Ceppar ile körüşip ayttı.
«O, (Emine Ceppar – QA) Ukraina tarafı esas maqsadı Qırım işğaliniñ halqara toplulıq tarafından tanılmaması olacaq Qırım platformasınıñ esas elementlerini nasıl köre ve nasıl toldurmaq istegenine dair tafsilâtlı malümat berdi», – dep aytıla Ukraina Tış işler nazirliginiñ malümatında.
Kristina Kvin, Ukrainanen işbirligi yapmağa azır olğanını bildirip, Devlet kâtibi Mike Pompeo aydınlatqan Qırım beyannamesinde qayd etilgen ABD fikri deñişmey, dep qayd etti – «Qırım Ukrainanıñ bir parçası ola ve ABD Rusiyeniñ onı ilhaq etmek ıntıluvlarını bir vaqıt qabul etmeycek».
Emine Ceppar, eñ yaqın vaqıtta Ukraina tarafından BM Baş Assambleyasına çıqarılacaq Qırımnen bağlı yañı ve quvetleştirilgen qararlarnıñ qabul etilüvi müim ola, dep qayd etti.
Ukraina prezidenti Volodımır Zelenskıynıñ oktâbrniñ 20-nde bildirgenine köre, Donbastaki barışıq ve Qırım işğaliniñ bitmesi onıñ prioritetleri ola. O, yarımadanı işğalden qurtarmaq içün çalışacaq Qırım platformasınıñ quruluvı aqqında hatırlattı.
Qırımnı işğalden qurtaruv halqara meydançığı – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
