ABD ve AB Qırım işğali sebebinden Rusiyege qoyulğan sanktsiyalarnı yımşatmağa niyetinde degiller. Bunı ABD-niñ Rusiyedeki elçisi John Sullivan “Dojd” telekanalınıñ yaynında ayttı.
“Biz sanktsiyalarnı yımşatmaycaqmız, er alda ne ABD, ne bizim ortaqlarımız ve ittifaqdalarımız bu adiseler (Rusiye tarafından Qırımnıñ işğali – QA) neticesinde qoyulğan sanktsiyalarnı yımşatmağa niyetinde degiller. Bundan qaçmaq olmaz – subetni böyle başladıq, devam etecekmiz”, – Sullivannıñ aytqanlarından RİA Novosti alıntı ketire.
Onıñ sözlerine köre, Ukrainadaki vaziyet meselesi Amerika reberligi içün prioritet olaraq qala.
“Em icra akimiyeti, em de kongress qanunğa riayet etmezden topraq bütünligini deñiştirüv qabul etilmez, dep bildireler”, – elçiniñ aytqanlarından TASS alıntı ketire.
John Sullivan, Almaniya kantsleri Angela Merkel ve Frenkistan prezidenti Emmanuel Macron “meseleniñ Ukraina ve halqı içün adaletli al etileceginiñ tarafdarıdırlar”, dep bildirdi. Bunı RBK haber ete.
ABD-niñ Rusiyedeki elçisi, ABD akimiyetiniñ Minsk anlaşmalarına yanaşması deñiştirmegenini da qayd etti.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
