ABD prezidenti Joe Biden Qırımnıñ ve Aqyarnıñ işğal etilmesi içün Rusiyege qarşı qoyulğan sanktsiyalarnı bir yılğa uzattı. Bu aqta Beyaz evniñ saytında haber etile.
Qayd etilgeni kibi, söz Donald Tramp ve Baraka Obama vaqtında qoyulğan sanktsiyalar aqqında kete. Joe Bidenniñ bildirmesinde, bu sanktsiyalar 2021 senesi martnıñ 6-dan soñ quvette qalmalılar, dep qayd etile.
«Bu fermanlarda tarif etilgen areketler ve siyaset Amerika Birleşken Devletleriniñ milliy telükesiziligi ve tış siyaseti içün alâ daa pek telükeli. Bu sebepten... 13660 icra qararınen memlekette ilân etilnen sanktsiyalar rejimini daa bir yılğa uzatam», – dep yazıla bildirmede.
Amerikanıñ Devlet kâtibi Entoni Blinken, ABD Rusiyeni Qırımnıñ işğalini toqtatmağa çağırğanını bildirdi.
Fevralnıñ 25-nde Ukraian prezidenti Volodımır Zelenskıy Oksana Markarovanı Ukrainıñ ABD-deki elçisi vazifesine tayin etti.
Prezident ofisi Ukraina devlet başınıñ ABD prezidenti Joe Biden ile körüşüvini ve telefondan qonuşmasını azırlay. Kyiv Donbasta vaziyetniñ tınç çezilmesi ve Qırımnıñ işğalden azat etmesi ile bağlı aytışmalarğa ABD-ni daa ziyade celp etmek içün çalışacaq.
2020 senesi oktâbr ayında ABD diplomatları Qırımnı işğalden qurtaruv platformasını qurmaq içün Kyiv ile işbirligi yapmağa azır, dep bildirgen edi.
2018 senesi iyülniñ 25-nde o vaqıt ABD devlet kâtibi olğan Mike Pompeo Amerika Birleşken Devletleri Rusiyeniñ Qırım ilhaqını iç bir vaqıt qabul etmeycegi aytılğan «Qırım beyannamesini» çıqardı. Pompeo, ABD Ukraina topraq bütünliginiñ ğayrıdan tiklenmesini kene israr etecek, dep bildirdi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
