ABD OSCE elçisi James Gilmore OSCE daimiy şurasınıñ toplaşuvında işğal etilgen Qırımda Ukraina vatandaşları, hususan qırımtatarlarnıñ taqip etilüvinden qasevetlengenini bildirdi.
Bu aqta «Amerika Sesiniñ» ukrain hızmeti bildire.
Elçi, ABDniñ «işğalge qarşı çıqqanı içün Rusiye apishanelerinde qanunsız tutulğan Ukraina vatandaşları içün qasevetlengenini» qayd etti.
«Berilgen malümatqa köre, aprelniñ 2-nden berli ceza psihiatriyasında tutulğan «Qırım birdemligi» faali Yaşar Muyedinovnıñ vaziyeti qasevetlendire», – dep bildire Gilmoreniñ aytqanlarını neşir.
Elçi ABD adından Rusiyeni «qırımtatarlarğa qarşı repressiya toqtatmasına, siyasiy mabüslerni azat etmesine ve Meclis yasağını lâğu etmesine» çağırdı.
O, Moskvanıñ Qırımdaki 3330 ukrainalını Rusiye ordusına askerlikke almaq planlarını da izaatladı.
«Qırımdan Rusiye silâlı quvetlerine zornen çağırılğan ukrainalılarnıñ sayısı 22 biñge artacaq, – dep qayd etti Gilmore. – Bu halqara uquqnı boza».
Bu afta advokat Venera Abdışayeva onıñ müvekkili, Aqmescitteki ekinci «Hizb ut-Tahrir davasınıñ» mabüsi Yaşar Muyedinov Qırım klinik psihiatrik hastahanesine mahkeme-psihiatrik ekspertizasınıñ yapılması içün yollanıldı. O, oña yapılğan maneviy basqı sebebinden prokuraturağa şikâyet ve hastahane memuriyetine ariza azırladı.
Aprelniñ 4-nde Rusiye Mudafaa nazirligi bildirdi ki, 3 300 qırımlı arbiy hızmetke alınacaq. Qayd etilgenine köre, çoqusı Qırım tışına, qomşu Rusiyeniñ Cenübiy ve diger arbiy okruglarınıñ arbiy bölüklerine yollanılacaq.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
