OSCE-deki ABD missiyası qırımtatar siyasetçisi ve faali Nariman Celâlnıñ tevqif müddetiniñ uzatılması ve Rusiyeniñ Bağçasaray "Hizb ut-Tahrir" davasınıñ mabüslerine bergen yañı ükümlerden raatsızlıq bildirdi.
Bunı noyabrniñ 4-nde Viyanada OSCE-niñ daimiy missiyasınıñ oturışında missiya yolbaşçısınıñ vazifesini vaqtınca icra etken Elizabet Rozenştok-Siller bildirdi.
"Rusiye tarafından işğal etilgen Qırımda ciddiy bozuvlar aqqında haberler almağa devam etemiz. Qırımtatar Milliy Meclis reisiniñ muavini Nariman Celâl psihiatrik hastahanesinde qala. Oktâbrniñ 28-nde Aqmescit mahkemesi tevqif müddetini üç uyğa uzattı. Oktâbrniñ 29-nda dört qırımtatar 12 yıldan 17 yıl apis cezasına mahküm etildi. Olar terrorcılıqnen qabaatlanalar. Amma kerçek sebep Qırımnıñ Rusiye tarafından işğaline qarşı tirenüvdir", - dedi o.
Rozenştük-Siller qayd etti ki, ABD Rusiye mahkemesiniñ ciddiy yürek hastalığı çekken Amet Suleymanovnı apis etmek qararırnlan hususan raatsızdır.
"Uquq qoruyıcılar Suleymanovnıñ Rusiye cezahanesinde 12 yıl yaşap olamaycağından qorqalar. Vaziyetten haberdar olıp turmağa devam etemiz ve Rusiyeni işğalge qarşı çıqqanlarnıñ siyasiy sebeplerden taqip etilmesini toqtatamağa çağıramız", - dedi o.
Rusiye er vaqıt kibi böyle çağıruvlarğa riayet etmey.
Rostov-na-Donu Cenübiy okrugınıñ arbiy mahkemesi oktâbrniñ 29-nda Bağçasaraydaki üçünci «Hizb ut-Tahrir davasınıñ» mabüslerine üküm çıqardı. Mahkeme olarnı «akimiyetni zorbalıq yolunen zapt etüv ıntıluvında» ve «terror teşkilâtında iştirak etüvde» qabaatlı tanıp, mabüslerni sert rejimli koloniyağa almağa qarar berdi. Bu aqta mahkemeden soñ mahküm etilgen qırımlılarnıñ advokatları bildirdi.
Advokat Edem Semedlâyevniñ malümatına köre, Seytumer Seytumerov 17 yıl sert rejimli koloniyada qalmasına, Osman Seytumerov 14 yıl, Amet Suleymanov 12 yıl, Rustem Seytmemetov 13 yılğa üküm etildi. Advokatnıñ bildirgenine köre, mabüsler başta 3 yıl ve 6 ay apishanede yatmalı.
Advokatlar, ükümge qarşı istinaf şikâyetlerini berecek, dep bildirdi.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
