ABD kongressi Rusiyege qarşı yañı sanktsiyalar qanun leyhasını resmiy saytında derc etti. Vesiqa fevrallniñ ortasında Demokratik ve Cumhuriyet firqalarını temsil etken Amerika senatorları tarafından teklif etildi.
Vesiqa Rusiye devlet borcuna yatırım sıñırlavını, şingen tabiiy gaz istisal etüv boyunca Rusiye leyhalarına yatırımlarğa qarşı sanktsiyalarnı köz ögüne ala.
Keçken sene yazda qanun leyhasınıñ müellifleri, senatorlar Grem ve Menendes, Moskvağa qarşı sanktsiyalar kirsetmege teklif etken edi. Qanun leyhası Rusiye devlet borcunıñ satın alınmasını sıñırlağan, ABDde Rusiye devlet banklarınıñ esaplarını blok etken edi. Faqat vesiqa qabul etilmedi.
Senatorlarnıñ yañı teklif daa sert ola, dep yazdı The Bell neşiri.
Fevral başında Moody’s reyting agentliginiñ ekspertleri Rusiye iqtisadiyatı devlet borcuna qarşı ABD sanktsiyalarına dayanır, dep qarar çıqardı.
Agentlik Rusiyeniñ yatırım reytingini çöplük derecesinden stabil tahminli yatırım seviyesine qadar arttırdı.
Fevralniñ 27-nde Financial Times gazetası Rusiye muhalifet siyasetçisi Aleksey Navalnıy ile intervyünı derc etti. Navalnıy Rusiyeniñ maliye institutlarına degil de, prezident Vladimir Putinge qoltutqan iş adamlarına qarşı sanktsiyalarnı kenişletmege teklif etti.
