ABD Birleşken Milletler elçisi Nikki Haley bazarertesi künü, noyabrniñ 26-nda, saat 11:00-de BM Havfsızlıq şurası toplanacağını ilân etti.
Böylece, Havfsızlıq şurasınıñ toplaşuvı Qırım saatine köre 19:00-da (Kyivde saat 18:00-de) başlaycaq.
Radio Svoboda bildirgeni kibi, saat 16:00-da Yuqarı Radanıñ qapalı toplaşuvı olacaq, Ukrainada cenk vaziyetini kirsetme meselesi baqılmalı.
Noyabrniñ 26-nda gece Ukraina milliy telükesizlik ve mudafaa şurasınıñ toplaşuvında cenk vaziyetini kirsetmek içün azırlıq körmege qarar alındı.
Ukraina prezidenti Petro Poroşenkonıñ bildirgenine köre, Anayasağa köre, arbiy şuranıñ Yuqarı Radağa Ukrainada cenk vaziyetini kirsetme teklifini baqmaq muracaatınen bulunmaq qararına qoltuta.
Bundan evel Ukraina prezidentiniñ Qırım Muhtar Cumhuriyetindeki daimiy temsilcisi Boris Babin bildirdi ki, FSB Keriç boğazında Ukraina gemilerine qarşı silâ qullandı. Soñki malümatqa köre, FSB açqan ateş neticesinde altı Ukraina deñizcisi yaralandı.
Rusiye FSBsi Ukraina gemilerine qarşı silâ qullanılğanını tasdıqlap, yaralanğan üç Ukraina deñizcisi aqqında haber etti.
Ukraina milliy telükesizlik ve mudafaa şurasınıñ kâtibi Oleksandr Turçınov MTMD toplaşuvında Ukrainada cenk vaziyetini 60 künge ilân etmege teklif etti.
Noyabrniñ 25-nde Ukraina Arbiy deñiz quvetleri bildirdi ki, Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Qırımdaki Rusiye FSB idaresi bildirgenine köre, noyabrniñ 25-nde Ukrainağa ait üç arbiy gemi «Rusiyeniñ devlet sıñırından qanunsız» keçip, Keriç boğazı yolunda «telükeli areketler» yaptı.
Daa soñra Rusiye Keriç boğazını vatandaş gemileriniñ keçmesi içün qapattı. Aynı vaqıtta, Rusiye üç gemisini Keriç boğazından yiberdi, amma Ukraina gemileriniñ Azaq deñizine keçişini blok etmege devam etti.
Ukraina Tış işler nazirligi Rusiyeniñ noyabrniñ 25-nde Qara ve Azaq deñizlerinde yapqanlarını tenqit etti.
Soñki vaqıtları Azaq deñizi Rusiye uquq qoruyıcıları, birinciden Ukraina limanlarına ketken ve andan kelgen gemilerni tutqan sıñırcıları, tarafından yapılğan provokatsiyalarnıñ yeri oldı.
