Amerika Birleşken Devletleriniñ Kyiv elçihanesi çalışmağa devam ete, dep bildirdi mayısnıñ 28-nde müessise.
"ABD elçihanesi açıq. İşimizde bir deñişme yoq, farqlı bir malümat yalan", – dep aytıla haberde.
Diplomatlar ABD Devlet departamenti içün Amerika vatandaşlarınıñ telükesizligi ve imayesinden "daa müim bir şey yoq" dep, müessise Kyivdeki elçihane vaziyetini muntazam sürette teşkere, dep qoşa.
Aynı vaqıtta elçihane ABD vatandaşlarına "silâlı zıddiyet sebebinden er angi maqsadnen" Ukrayinağa seyaat etmemek kerek, dep tekrarladı.
Ukrayina Tış işler nazirligi Amerika elçihanesi Rusiyeniñ yañı darbe telükelerinden soñ Kyivni terk etmedi, dep bildirdi. Avropa Birligi tış siyaset hızmetiniñ yolbaşçısı Kaya Kallas Avropa memleketleriniñ elçihaneleri Kyivde qaldı, "Amerika ise ketti", dep ayttı.
Mayısnıñ 25-nde Rusiye Tış işler nazirligi Kyivde "qararlar alınğan merkezlerge ve komandanlıq noqtalarına" qarşı darbelerni ilân etti. Rusiye nazirligi "çetel vatandaşlarını, şu cümleden diplomatik missiya ve halqara teşkilâtlarnıñ vekillerini" şeerni tez terk etmek kerek, dep tenbiley.
Ukrayina Tış işler nazirligi Rusiye tarafınıñ Kyivge qarşı yañı darbeleri qorquzuvlarından soñ Ukrayina tarafı Rusiye tarafından Kyiv ve diger Ukrayina şeerleri içün telüke seviyesi keçken yıllar ve aylarğa köre aynı seviyede qala, dep bildirdi. Ukrayina Tış işler nazirligi qayd etkenine köre, bu vaziyette Rusiyeniñ yañı qorquzuvları "şantajdan başqa bir şey degil".
AB Kyiv temsilciliginiñ yolbaşçısı Katarina Maternova bildirgenine köre, Rusiyeniñ tenbisi telâşqa yol açmaq içün yapıldı.
ABD Devlet kâtibi Marko Rubio Rusiye Tış işler naziri Sergey Lavrov telefonda Kremlniñ tenbisi aqqında hatırlatıp, Amerika tarafını "Kyiv pek telükeli yer olacaq" dep tenbilegenini bildirdi. Aynı vaqıtta Rubio "Kyiv bir qaç yıldan berli pek telükeli yer ola", dep qayd etti.
Onıñ aytqanına köre, Rusiyeniñ Ukrayinağa qarşı darbeleri, yaqında olğan kütleviy ücüm "cenk bitmeli" ve ABD mında "konstruktiv ve faydalı rol oynamağa azır".