ABD elçihanesi Rusiyeni yanvarniñ 22-nde Maneviy birleşüv kününi qayd etken Ukrainanıñ topraq bütünligini ürmet etmesine çağırdı.
«Ukrainanıñ Maneviy birleşüv kününde Rusiyeni Ukrainanıñ suvereniteti ve topraq bütünligini halqara seviyede tanılğan sıñırlarda, Qırım ve Donbasnen ve deñizlerinen beraber ürmet etmesine çağıramız», – dep aytıla ABDniñ Ukraina elçihanesiniñ Twitter haberinde.
Çarşenbe künü, yanvarniñ 22-nde, Ukraina Maneviy birleşüv künü qayd etile. Bu sene memlekette çeşit tedbirler ötkerilecek. Kyivdeki Y.Paton köprüniñ qaldırım qısmında barışıq aktsiyasınıñ keçirilmesi planlaştırıla. Aktsiya iştirakçileri köpürde 30 metrlik devlet bayrağını açıp, Ukraina gimnini icra etecekler.
2014 senesiniñ başında Qırım Rusiye tarafından işğal etilgen soñ bu bayram yarımadada qayd etilmey, lâkin Aqmescitte T.Şevçenko abidesi ögünde ukrain timsallerinen yaraştırılğan çeçekler peyda ola.
2017 senesi Qırımdan köçmege mecbur olğanlar ve diger faaller Kyivde «birleşüvniñ canlı zıncırını» yaptı.
Ukrainanıñ Maneviy birleşüv Künü er yıl, Ukraina Halq Cumhuriyeti (UHC) ile Ğarbiy Ukraina Halq Cumhuriyetiniñ (ĞUHC) 1919 senesi yanvarniñ 22-nde ğayrıdan bir ukrain devletine birlişmesi Aktı ilân etilgen kününde qayd etile.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
