Aprelniñ 12-nde ABD devlet kâtibi Entoni Blinken ve NATO baş kâtibi Yens Stoltenberg Ukraina ile sıñır yaqınlarında Rusiye ordusınıñ toplanmasını deral toqtatılmasınıñ kerekligini muzakere ettiler.
ABD tışqı siyaset idaresiniñ matbuat kâtibi Ned Praysnıñ beyanatında qayd etilgeni kibi, Blinken ve Stoltenberg, Rusiye tarafından Ukraina sıñırları boyunca ve işğal etilgen Qırımda tecavuzkâr arbiy azırlıqlarınıñ deral toqtatılmasına ihtiyac olğanını qayd etkenler.
Diger meseleler arasında Afğanistanda barışıq esnasınıñ ileriletme istiqballeri ve kelecek NATO sammiti ile bağlı sualler muzakere etilgen.
Entoni Blinken ve Yens Stoltenberg arasındaki subet Devlet departamenti reberiniñ Brükselge yolculığı arfesinde olıp keçti, dep haber etti "Amerika sesi".
Ukraina Tış işler naziri Dmıtro Kuleba Ukraina-NATO komissiyasınıñ nevbetten tış toplaşuvına baracaq. Bu aqta Ukraina Tış işler nazirligi bildire. Ziyaret vaqtında o, NATO baş kâtibi Jens Stoltenberg ile körüşecek.
Martnıñ 30-nda Ukraina silâlı quvetleriniñ baş komandanı Ruslan Homçak bildirdi ki, Rusiye, «Zapad-2021» strategik talimlerine azırlıq manaçığınen Ukrainanıñ şarqiy sıñırlarına taktik gruppalarını çeke. Kreml, Rusiye ordusınıñ Rusiyede areket etmesi diger memleketlerni, hususan Ukrainanı qasevetlendirmemeli.
Ukrainanıñ ğarbiy ittifaqdaşları oña qol tutqanını bildirdi. Aprelniñ 2-nde ABD ve Ukraina prezidentleri Joseph Biden ve Volodımır Zelenskıy telefonda laf ettiler. Beyaz saraynıñ malümatına köre, «prezident Biden Rusiyeniñ Donbas ve Qırımdaki istilâsı vaziyetinde Ukraina suvereniteti ve topraq bütünligine qol tutqanını tasdıqladı».
Daa soñra Avropa Birliginiñ Tış siyaset ve telükesizlik siyaseti yuqarı temsilcisi Josep Borrell Ukraina akimiyetini Rusiye tarafından yapılğan istilâ vaziyetinde «Avropa Birligi destek köstergenine» işandırdı.
Sıñırda ve Donbasta olğan adise-vaqialar sebebinden NATO da Ukrainağa qol tutqanını bildirdi.
