ABD Devlet kâtibi Entoni Blinken tanılmağan «Qırım referendumı»nıñ yedinci yıllığında Rusiyeni işğal etilgen yarımada üzerinde nezaretni Ukrainğa qaytarmağa çağırdı.
Bu aqta ABD-niñ Kyivdeki elçiliginiñ Twitter saifesinde yazıla.
«Sahte referendumdan yedi yıl soña Rusiyeniñ Qırımnı zapt etmesi alâ daa qanunsızdır. ABD Rusiye tarafından Qırımnıñ qanunsız işğalini tanımay ve iç bir vaqıt tanımaz. Qırım bu Ukraina. Rusiyeni Qırımnıñ işğalini deral toqtatmağa, bütün ukrain siyasiy mabüslerini azat etmege ve yarımada üzerinde tam nezaretni Ukrainağa qaytarmağa çağıramız», – elçilik Blinkenniñ aytqanlarından alıntı ketire.
Büyük Britaniya Rusiye 2014 senesi yarımadaadn keçirgen «Qırım referendumı»nıñ neticelerini tanımay. Bu aqta Twitter saifesinde Büyük Britaniyanıñ Ukrainadaki elçisi Melinda Simmons yazdı.
Ukraina prezidenti Volodımır Zelenskıy, 2014 senesi Qırımda olıp keçken Rusiye «referendumı»nı «sahte» adlandırdı ve Ukraina akimiyeti işğal etilgen yarımadanı azat etip, keri qaytarmağa tırışqanına inandırdı.
Rusiye Ukraina Milliy telükesizlik ve mudafaa şurası tarafından qabul etilgen Qırımnı işğalden qurtaruv strategiyasını ve «Qırım platforması» teşebbüsini «telüke» ve «Rusiye Federatsiyasınıñ topraq bütünligine qast etüv» olaraq saya, dep bildirdi martnıñ 15-nde Rusiye Tış işler nazirliginiñ spikeri Mariya Zaharova.
Ukraina TİN Rusiyeni «Qırım platforması»nda iştirak etüv sebebinden «siyasiy bülling» etmemege çağırdı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
