ABD Devlet departamentiniñ resmiy temsilcisi Ned Prays, ABD Rusiye Qırım ealisini cedvelge alğanını takbih etkenini bildirdi.
Bu aqta Prays öz Twitter saifesinde yazdı.
"ABD Rusiyeniñ işğal etilgen Qırımda ealiniñ cedvelge alınmasını takbih ete, çünki bu Ukraina topraq bütünligi ve suverenitetini bozmaq içün daa bir ıntıluvdır. Qırım Ukrainadır", - dep yazdı o.
Ukraina Rusiyeniñ işğal altındaki Qırımda ve Aqyarda ealini cedvelge alğanını takbih ete. Bu aqta oktâbrniñ 15-nde derc etilgen Ukraina Tış işler nazirliginiñ beyanatında aytıla.
Rusiyede oktâbrniñ 15-nden noyabrniñ 14-ne qadar eali cedvelge alınacaq. Sakinler aqqında malümat Qırımda da toplanacaq. Yarımada sakinlerini rusiyeliler 2014 senesi de cedvelge alğan edi, o vaqıt Qırımda milliy terkipniñ deñişmeleri qayd etildi.
Rusiyeniñ 2014 senesi Qırımda keçirgen cedvelge aluv malümatına köre, cedvelge alınğan Qırım ealisi 1,89 million kişi, Aqyar ealisi ise 393 biñ insan oldı.
Ukraina akimiyeti bu raqamlarğa esaslanıp, Rusiyeni vaqtınca işğal etken yarımadağa vatandaşlarını ketire, dep qabaatlay. 2001 senesi Ukraina ealini cedvelge alğanda yarımadada ukrain ve qırımtatarlarnıñ sayısı bayağı çoq edi.
