ABD Devlet departamenti Rusiyeniñ Ukrayinağa qarşı cenkinde ateşkes olmağance Rusiyenen muzakerelerde iç bir añlaşma ve qararlar olmaycağını bildirdi. Bu aqta aprelniñ 15-nde keçirilgen brifingde ABD Devlet departamentiniñ vekili Tammy K. Bruce bildirdi.
«Aytıp olacağım, başından açıq olğan şeyni hatırlatmaqtır: qanlı cenk toqtamağance iç bir muzakere, iç bir qarar, iç bir añlaşma olamaz. Rusiye ile laqırdı ete. Ve Tal bazarından soñ kimler barışıq ve kimler ateş istegeninen bağlı daa çoq sual olmalı», – dedi spiker Rusiye ile muzakerelerde sanktsiyalarnıñ yımşatıluvı laf etildimi sualine cevap berip.
Tammy K. Bruce qayd etkenine köre, Rusiyeniñ Ukrayinağa qarşı cenki «alâ daa insan qırğını».
«Bu deñişmedi. Ve bu toqtamağance böyle bir şey olmaycaq, amma biz ateş toqtatılsın dep, çalışmağa devam etemiz», – dep qoştı o.
Moskva resmiy şekilde barışıqqa ıntılğanını bildire, amma Ukrayina işğal etilgen Qırım ve Moskva ilhaqını ilân etken, amma bütünley kontrol etmegen dört vilâyetten vazgeçecek, NATOğa kirmeycek şartınen ve diger talaplar aqqında aytıladır.
Soñki vaqıtları ABD prezidenti Donald Trump Rusiye «laftan areketke keçip», barışıqqa ıntılğanını köstermeli, dep bir qaç kere ayttı. O, Rusiyege qarşı sanktsiyalar arttırıla bile, dep inkâr etmey. Aynı vaqıtta Rusiyeniñ aprelniñ 13-nde Sumı şeerine qarşı yapqan ve 35 insannı öldürgen darbesi sebebinden yañı sanktsiyalar olacaqmı sualine yoq dep, Rusiyege qarşı zaten sert sanktsiyalar bar, dep cevapladı.
Sumı şeerine qarşı darbeni izaatlap, ABD prezidenti «hata» olması mümkün dep tahmin etti, baş kâtip Marko Rubio ve Ukrayina meseleleri mahsus vekili Kit Kellog Rusiyeni doğrudan takbih etti.
ABD prezidentiniñ mahsus vekili Steven Witkoff aprelniñ 11-nde Rusiye prezidenti Vladimir Putinnen körüşti. Muzakereler dört saattan çoq devam etti.
Witkoff Putinnen yapılğan bu muzakerelerni «işandırıcı» dep adlandırdı. Onıñ aytqanına köre, olar Rusiyeniñ Ukrayinadaki cenkini toqtata bilecek adımlarnı muzakere etkenler.
Aprelniñ 14-nde Witkoff Fox News yayınında barışıq añlaşması beş regionnıñ meselesini çezecek, dep bildirdi. Ne aytqanını añlatmadı. Rusiye işğal etilgen Qırım, topraqlarınıñ bir qısmını işğal etken Donbas, Lugansk, Zaporijjâ ve Herson vilâyetlerinde onıñ kontrolini tanımağa talap ete.
Ukrayina prezidenti Volodımır Zelenskıy ABD prezidentiniñ mahsus vekili aytqanlarını izaatlap, Ukrayina içün «vaqtınca işğal etilgen topraqlarnı Ukrayina olaraq degil, Rusiye olaraq qabul etmek qırmızı çizgi» ola, dep ayttı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
