ABD Devlet Departamenti, işğalge qarşı çıqqan qırımlılarnı azat etmege Rusiyeni çağırttı. Bu aqta ADB müessiseniñ vekili Roberto Palladino aytıp berdi.
“Qırımnıñ Rusiye işğaline qarşı tirenüv künü biz, işğalge qarşı çıqqan qırımlılarnıñ qısqa müddette azat etilmesine kene de çağırtamız. Sentsov, Kölçanko, Baluh, Zeytullayevğa - azatlıq! Qırım - bu Ukraina”, - denile Palladinonıñ Twitter yazısında.
Ukrainada salı künü, fevralniñ 26-nda, «Qırımnıñ Rusiye işğaline qarşı tirenüv künü» qayd etile. 2014 senesi şu künü Qırım Muhtar Cumhuriyetiniñ Yuqarı Şurası ögünde Ukraina topraq bütünligine qoltutuv mitingi olıp keçken edi. Miting iştirakçilerine qarşı Rusiye tarafdarı olğanlar, hususan «Rus birligi» firqası çıqtı.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
