ABD prezidenti Donald Trump cuma künü Dünya sağlıq teşkilâtı ile alâqalarını kese, dep bildirdi. ABD teşkilâtqa para da bermeycek, çünki, onıñ aytqanına köre, «DST koronavirus ile küreş vazifesini becerip olamadı, çünki bu büyük teşkilât tamamen Qıtay kontroli altında buluna», dep haber ete Azatlıq Radiosı.
Trumpnıñ aytqanına köre, Qıtay akimiyeti mecburiyetlerini körmemezlikke urıp, Dünya sağlıq teşkilâtı yañı koronavirusnen bağlı yalan aytsın dep, oña basqı yaptı.
ABD Dünya sağlıq teşkilâtınıñ bücetine 450 million dollar bere, Qıtay tahminen 40 million dollar bere, dep qayd etti Trump.
ABD – Dünya sağlıq teşkilâtına eñ çoq para bergen memleket. Washingtonnıñ Dünya sağlıq teşkilâtından çıqmaq qararı bu teşkilâtnı zayıflatır, dep beklenile. Trumpnıñ aytqanına köre, Amerikanıñ maddiy yardımı dünyada sağlıq saasında olğan diger acele meselelerniñ çezilmesine kösterilecek.
