ABDde Charlotteteki Şimaliy Carolina Universitetiniñ binasında açılğan ateş neticesinde eki insan elâk oldı. Daa dört kişi yaralandı, olardan ekisiniñ alı kritik. Bu aqta Reuters haber ete. Yaralanğanlar aqqında malümatnı universitetniñ matbuat kâtibi Lester Oliva da tasdıqladı, dep bildire Azatlıq Radiosınıñ rus bürosı.
Yerli kütleviy haber vastalarınıñ malümatına köre, atışta şübheli sayılğan kişi silâsı olğan universitet studenti ola, onı bina yanında telükesizlik quvetleri yaqaladı. WBTV telekanalınıñ haber etkenine köre, atış yerli saatqa köre aqşam saat altılarda universitetniñ memuriy binası yanında oldı. Universitette kelecek afta başlaycaq netice imtianları ögüne soñki ders künü keçirilgen edi.
Ateş açqan insannıñ sebepleri daa haber etilmey.
Oquv yurtunıñ saytında derc etilgen malümatqa köre, Şimaliy Carolina Universitetinde 26 000-den ziyade student oquy. Bundan ğayrı, binada 3 000 universitet hadimi çalışa.
2018 senesi oktâbrniñ 17-nde Keriç politehnik kollecinde patlav ve atışuv oldı. Rusiye Tahqiqat komitetiniñ malümatına köre, Keriç politehnik kollecinde olğan patlavnı 4-ünci kurs studenti, 18 yaşında Vladislav Roslâkov kerçekleştirdi. O, «özüni öldürdi». Facia neticesinde 21 insan elâk oldı. Qırımda üç künlik matem ilân etilgen edi.
Oktâbrniñ 19-nda Keriçte ve Yedi Quyu rayonında ücüm qurbanlarınıñ cenazeleri qılındı. Vedalaşuv merasimine biñlernen insan keldi.
Qırım Muhtar Cumhuriyetiniñ prokuraturası Keriç politehnik kollecinde olğan patlavnı terror ücümi olaraq tasnif ete.
