Ukraina Tış işler naziri Dmıtro Kulebanıñ bildirgenine köre, iyünniñ 18-nde Avropa Birliginiñ Şurası Qırımnıñ qanunsız ilhaqı sebebinden Rusiyege qarşı sanktsiyalarnı bir yılğa uzattı.
Bu aqta Kuleba Twitterde yazdı.
«Bugün AB Şurası Qırımnıñ qanunsız işğali sebebinden Rusiyeşe qarşı sanktsiyalarnı 2021 senesi iyün ayına qadar uzattı. Bu qarar içün minnetdarım. İnsan aqları bozuluvı, «pasportlaştıruv», Keriç boğazından tren seferleriniñ başlatıluvı, Qırımdaki qanunsız rey berüv içün basqı quvetleştirilmeli», – dep yazdı Ukraina naziri.
Daa evel AB lideri COVID-19 sebebinden Rusiyege qarşı sanktsiyalarnı lâğu etmek teklifini red etti. AB elçileri iyünniñ 10-nda Qırım sanktsiyalarını daa bir yılğa uzatmağa añlaştı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
