AB Ukraina temsilciliginiñ yolbaşçısı Matti Maasikas Rusiyeni tutulğan bütün qırımtatarlarnı azat etmes ine ve Qırımda taqip ve qorquzuv siyasetini toqtatmasına çağırdı.
«Qırımtatarlarnıñ Rusiye tarafından kütleviy şekilde tutuluvını takbih etem. Yaqında 31 insan, şu cümleden qadın ve balalar tutuldı. Tutulğanlar tez vaqıtta azat etilmeli, qanunsız ilhaq etilgen Qırımda taqip ve qorquzuvlar toqtatılmalı», – dep yazdı Maasikas Twitterde.
Aqmescitte noyabrniñ 23-nde aqşam Rusiye quvetçileri azatlıqqa çıqqan Edem Semedlâyevni qarşılamaq içün vaqtınca tutuv izolâtorınıñ binasına kelgen faallerni tuttı. 31 insan tutuldı, aralarında 10 qadın, jurnalistler ve matbuat kartları olğan «Qırım birdemliginiñ» mühbirleri bar. Tutulğanlar üç polis bölügine alıp ketirildi.
Aqmescitniñ vaqtınca tutuv izolâtorınıñ binası ögünde tutulğan 15-ten çoq qırımtatar faali Rusiye kodeksiniñ memuriy maddesine istinaden apiske alındı.
Qırım Muhtar Cumhuriyeti ve Aqyar prokuraturası qırımtatar faalleriniñ tutuluvı sebebinden cinaiy tahqiqat başlattı.
Ukraina akimiyeti, aq qorçalayıcılar, çetel elçihaneleri ve missiyaları Rusiyeni Qırımda böyle taqiplerni toqtatmasına çağıra. Rusiye akimiyeti böyle çağıruvlarnı körmemezlikke ura.
