Avropa Birliginiñ Ukraina temsilciligi işğal altındaki Qırımda olıp keçken adise-vaqialarnı, hususan qırımtatarlarnıñ vaziyetini közete. Bu aqta AB Ukraina Temsilciliginiñ matbuat attaşesi David Stulik Qırım.Aqiqat Radiosınıñ yayınında bildirdi.
«Közetemiz… qırımtatarlarnıñ meselesini, olarnıñ Qırımdaki vaziyetini… Qırımda insan, milliy azlıqlar aqlarınıñ bozulğanını qayd etemiz… Qırımda olıl keçkenlerden bizni haberdar tutqan qırımtatar halqınıñ vekillerinen, Meclisnen, onıñ Kyivdeki temsilcilerinen bağ tutamız», – dedi o.
AB Ukraina Temsilciliginiñ matbuat attaşesi qayd etti ki, Qırımdaki vaziyetniñ monitoringi daimiy ola.
Avropa parlamenti oktâbrniñ 25-nde Rusiyege qarşı sanktsiyalarnı quvetleştirmege ve Ukrainada OSCE missiyasınıñ saasını kenişletmege çağırğan rezolütsiyanı qabul etti. Avropa Birliginiñ Qırım ve Donbas mahsus temsilcisi vazifesiniñ meydanğa ketirilmesi planlaştırıla.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
