Avropa Birligi ve ABD, Avropanıñ Rusiye energiya menbalarına tabiligini eksiltmek içün AB-ne ilâve şingen gaz teslimatı ile bağlı yañı añlaşma aqqında ilân ettiler.
Reuters agentligi haber etkeni kibi, Birleşken Devletler bu yıl Avropa Birligine ilâve olaraq 15 milliard kubometr şingen gaz bermege añlaşqanlar. Aynı zamanda eki taraf da vaqıt keçken soñ teslimatnı yılda 50 milliardğa qadar arttırmağa tırışacaqlar.
"Rusiye energiya menbalarına tabilikni eksiltmege ve yavaş-yavaş ondan qurtulmağa tırışamız... Biz, avropalılar, Rusiye yerine inanğanımız, bizim dostlarımız olğan teslimatçılarnen çalışıp başlamağa isteymiz", – dedi Avropa Komissiyasınıñ prezidenti Ursula von der Leyen.
"Bu teşebbüs eki esas meseleni közde tuta: birincisi, bu Avropağa Rusiye gazına tabilikni eksiltmek içün yardım etmek, ekincisi, Avropanıñ umumen gazğa olğan talabını azlaştırmaq", – dedi Jo Biden.
Kıyiv Avropa memleketlerini Rusiye energiya menbalarından red etmege defalarca çağırdı. Yaqında böyle adım aqqında ABD ve Büyük Britaniya ilân etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
