Avropa Birligi Şurası Qırımnıñ qanunsız işğali sebebinden Rusiyege qarşı qoyulğan sanktsiyalarnı 2023 yıl iyünniñ 23-ne qadar uzattı. Avropa Birliginiñ Tış işler yolbaşçısı Josep Borrellniñ bildirgeni kibi, AB Qırımnıñ qanunsız işğalini tanımay ve takbih etmege devam ete.
"Rusiye AB-niñ takbih etmege devam etken Ukrayinağa qarşı esassız basqıncı cenki ile Ukrayinanıñ suverenitetini ve topraq bütünligini daa da bozdı. AB Ukrayinağa Rusiyeniñ tecavuzına qarşı özüni mudafaa etmek ve tınç, demokratik ve çiçeklegen kelecek qurmaq içün ayırılmaz aqqını ömürge keçirmek içün yardım ete", - dep qayd etti o.
Bugünde-bugün amelde olğan sanktsiyalar 2014 senesi iyün ayında tayin etilgen ediye.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
