Avropa Birligi, «Ukraina topraq bütünligini yıqma içün» Ukraina ve Rusiyeden 177 vatandaş ve 48 uquqiy şahısqa qarşı qoyulğan sanktsiyalarnı yarım yılğa uzattı. Bu aqta AB Şurasınıñ cuma künü yayınlağan beyanatında yazıla.
«AB Şurası, Ukraina topraq bütünligini yıqma içün mesülietli olğanlarğa qarşı sanktsiyalarnı 2021 senesi sentâbrniñ 15-nece uzutmağa qarar aldı», – dep yazıla vesiqada.
Cedvelde, sanktsiyalar altında olğan 177 şahıs, olarnıñ arasında Qırımnıñ Rusiye başı Sergey Aksönov, Qırımnıñ Rusiye parlamentiniñ spikeri Vladimir Konstantinov ve Rusiye Devlet dumasınıñ deputatı Natalya Poklonskaya.
Sanktsiyalar barıp kelme sıñırlavını, aktivler buzlatıluvını ve para ya da diger iqtisadiy resurslarnıñ berilüv yasağını közde tuta.
İlk sefer sanktsiyalar 2014 senesi martnıñ 14-nde qoyulğan edi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
