Avropa Birliginiñ Ukrayinadaki temsilciligi Rusiye tarafından apis cezasına mahküm etilgen qırımtatar Nariman Celâlnıñ sağlıq alından ve haberlerniñ olmamasından raatsız.
"Siyasiy mabüs, Qırımtatar Milliy Meclis reisiniñ birinci muavini Nariman Celâlnıñ sağlıq alından raatsızmız. Bir buçuq aydan berli iç bir haber yoq. Berilgen malümatqa köre, o, 17 yıl qanunsız apis cezasını çekmek içün Qırımdan Sibirge etap etilmektedir", - dep yazıla bildirmede.
Evel onıñ apayı Leviza Celâlova Rusiyeniñ Krasnoyarsk bölgesindeki Minusinsk apishanesine etap etilmesi beklengen Nariman Celâlnıñ qayda olğanı alâ daa belli olmağanını haber etti.
2022 senesi sentâbrniñ 21-nde Rusiye kontrolindeki Qırımnıñ Yuqarı mahkemesi Nariman Celâlnı 17 yıl sert rejimli koloniyada qalmasına üküm etti. Bundan ğayrı, 700 biñ ruble para cezası berildi ve azatlığı 1,5 yılğa sıñırlandı.
Asan Ahtemov 15 yıl sert rejimli koloniyada qalmasına üküm etildi. Oña 500 biñ ruble para cezası berildi ve 1 yıl qadar azatlığı sıñırlandı. Aziz Ahtemov 13 yıl sert rejimli koloniyada qalmasına üküm etildi. Oña da 500 biñ ruble para cezası berildi ve azatlığı 1 yılğa sıñırlandı.
Oktâbrniñ 2-nde Nariman Celâl ve ağa-qardaş Ahtemovlar Aqmescitteki SİZO-2-den alındı ve Rusiye apishanelerine etap etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
