Avropa Biriligi, Yalta "Hizb ut-Tahrir davası" boyunca altı mahkemelengen adamnıñ ükmüni lâğu etip, olarnı azat etmege Rusiyeni çağırta. Bu, Avropa tış siyaseti hızmetiniñ resmiy temsilcisiniñ beyanatında aytıla.
AB-nde, rusiye mahkemesiniñ ükmüne - "Qırımda ukrain vatandaşlarnıñ Rusiye tarafından taqibatı" dep ayttılar.
"Avropa birligi, ne Qırım ve Aqyarda Rusiye qanunlarını, ne qırımlılarnıñ Rusiye mahkemelerine avuştırılğanı tanımay. AB, Rusiye bu ükümlerni lâğu eter ve qanunsız tutulğan ukrainlerni azat eter, dep bekley", - denile beyanatta.
Rostov-na-Donu şeeri Cenübiy okrugınıñ arbiy mahkemesi noyabrniñ 12-nde Yaltadaki «Hizb ut-Tahrir davasınıñ» altı mabüsini koloniyada qalmasına üküm etti. Mahkeme qararına köre, Muslim Aliyev 19 yılğa, İnver Bekirov 18 yılğa, Emir-Usein Kuku 12 yılğa, Vadim Siruk 12 yılğa, Arsen Cepparov 7 yılğa ve Refat Alimov 8 yılğa üküm etildi. Olar sert rejimli koloniyada qalacaqlar.
Rusiyeniñ Amnesty International reisi Aleksandr Artemyev işbu ükümni «siyasiy taqip» dep adlandırdı.
Ukraina Tış işler nazirligi bu üküm sebebinden Rusiyege narazılıq bildirdi.
Bu dava boyunca qabaatlanğanlar 2016 senesi fevral-aprel aylarında Yaltada tutulğan edi. Olarnı Rusiyede yasaqlanğan «Hizb ut-Tahrir» islâm siyasiy teşkilâtına alâqaları bar olğanında qabaatlaylar.
