AB ülkeleriniñ Daimiy vekilleriniñ komiteti. çarşenbe künü Ukrainanıñ topraq bütünligi, suvereniteti ve mustaqilligine zarar ketirgen şahıs ve teşkilâtlarğa qarşı şahsiy sanktsiyalarnıñ yarım yılğa uzatılmasını muzakere etmeden qabul etti.
Bunı sentâbr 9-ında Brüsselde Azatlıq.Radiosınıñ mühbiri Rikard Yozvâk haber etti.
Bundan ğayrı, bu sanktsiya cedveline yaqında Keriç köprüniñ qurulmasınen bağlı daa 15 adam ve teşkilât qoşulacağını bildirdi.
"AB vekilleri, Ukrainanıñ topraq bütünligine zarar ketirgen 175 adam ve 44 teşkilâtqa qarşı sanktsiyalarnıñ 6 ayğa uzatılmasına yesil ışıq berdi. Yaqında Keriç köprüniñ qurulışı sebebinden daa tahminen 15 adam ve bir qaç teşkilât bu cedvelge qoşulacaq", - yazdı o Twitterde.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
