Avropa Birligi memleketleriniñ elçileri iyünniñ 10-nda Qırım sanktsiyalarınıñ uzatılmasına qol tuttı.
«AB elçileri Qırımğa yatırım yapmaq yasağını bir yılğa deñişmesiz uzatmağa qarar aldı», – dep yazdı Azatlıq Radiosınıñ mühbiri Rikard Jozwiak.
Laf AB iştirakçi memleketleriniñ Rusiye işğal etken Qırımğa yatırım yapmaq yasağı aqqında kete.
Böyle tedbirler ilk sefer 2014 senesi Rusiyeniñ Ukrainağa ait yarımadanı qanunsız ilhaq etmesine cevap olaraq kirsetilgen edi. Ukraina sertifikatı olmağan mallarnıñ Qırımdan ketirilmesi yasaqlana, AB memleketleriniñ ya da aza devletleriniñ kontroli altında olğan birleşmelerniñ bayraqları altında Qırımda kruiz gemileriniñ kirmesi yasaqlana, Avropa Birliginiñ şirketleri tarafından işğal etilgen topraqta mülk ve şirketlerniñ satın alınması yasaqlana.
Naqliyat, tele bağları ve energetika sektorları içün mal ve tehnologiyalar Qırım şirketleri tarafından ihrac etilemez ya da yarımadada qullanılamaz.
Sanktsiyalar ilk sefer 2014 senesi iyülniñ 31-nde Rusiyeniñ Ukrainadaki vaziyetni kerginleştirüv areketlerine cevap olaraq kirsetilgen ve 2014 senesi sentâbr ayında quvetleştirilgen edi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
