Avropa Birliginiñ Tış işler ve telükesizlik siyaseti üzre Yuqarı temsilcisi Josep Borrell Financial Times gazetine intervyü vaqıtnda bildirdi ki, Avropa Birligi memleketleri Rusiyeniñ buzlatılğan valüta ihtiyatlarını Ukrayinanıñ cenkten soñraki ğayrıdan tiklenilüvine berilmesini ciddiy şekilde tüşünmelidir.
"Men bu areketniñ tarafdarım, çünki bu ğayet mantıqlı", - dedi Börrel. Misal olaraq, diplomat Afğanistan Merkeziy Bankınıñ ABD-de buzlatılğan aktivleri ile bağlı vaziyetni ketirdi. Bu seneniñ fevral ayında ABD terrorizm qurbanlarına tazminat ödemek ve memleketke gumanitar yardım köstermek içün Afğanistan Merkeziy Bankınıñ ihtiyatlarında olğan milliardlarnen dollarnı nezaretke aldı.
"Rusiyeniñ ihtiyatları ile oşağan areketlerni muzakere etmege mantıqlı olur edi, - dedi Börrel. - Bizim cebimizde paramız bar ve birisi maña añlatmalıdır ki, ne içün Afğanistan parası ile bunı yapıp olamız, Rusiye parası ile yapıp olamamız". FT qayd etkeni kibi, Avropa memleketelri bu yönelişte şimdilik iç bir adım atmadılar.
Börrel qayd etkeni kibi, Ukrayinanıñ ğayrıdan tiklenilüvi içün paranıñ ödenilmesi meselesi kün tertibiniñ esas memselelerinden biridir. Bunıñ içün "inanılmaz miqdarda para" kerek olacaq ve esas yük Avropa Birligi memleketleri üzerine tüşecek. Donor konferentsiyalarından toprlanğa para deñizde bir tamçıdır, çünki Ukratsinanıñ tiklenilmesine yüz milliardlarnen yevro kerek olacaq, dedi o.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
