Link açıqlığı

Saatnıñ esas haberi

«Aşalamağa, bir qıymetiñ olmağanını kösterecek olalar». Qırımtatar faali Bekirov Aqmescit mahkemesinde sözge çıqtı


Edem Bekirov, arhiv fotoresimi
Edem Bekirov, arhiv fotoresimi

Qırımtatar faali Edem Bekirov Rusiye kontrolindeki Aqmescitniñ Kiyev rayon mahkemesinde Aqmescit SİZOsında tutulması insan itibarını aşalamaqta, Rusiye tahqiqatı onı boysundırmağa tırışa, dedi.

Bunı Bekirov fevralniñ 7-nde mahkeme oturışuvında ayttı. Qırımtatar faaliniñ sıñırlav tedbiriniñ uzatılması baqılğan edi, dep bildire «Qırım birdemligi» cemaat birleşmesi.

«Birisi maña meni 58 yaşında böyle areketlerde qabaatlarlar dep aytsa edi, men inanmaz edim… SİZO kamerasında gece-kündüz nezaret eteler, ayaqyolğa barğanda bile. İnsannıñ itibarı aşalana, seni aşalamağa isteyler, bir qıymetiñ olmağanını kösterecek olalar. Yoq etecek olalar. Men advokat degilim, bir çoq uquqiy şeylerni bilmeyim. Amma qabaatım isbatlanmadı, bir şey yapmağanını ayta bilem. 15 kg torba alıp, onı başqasına bermege taqatım yetmez. Eñ çoq yarım kilo şişeni ala bilem», – dedi Bekirov.

O, qabaatsız olğanını qayd etip, Qırımğa «açıq niyetnen» anasını körmek içün barğanını ayttı. Bekirovnıñ hatırlatqanına köre, o, birinci derece saqatı, silâ taşımağa küçü yetmez.

Fevralniñ 6-nda Kyivdeki matbuat konferentsiyasında Edem Bekirovnıñ qızı Eleonora babasınıñ hastalıqları ölümine sebep ola, dep qorqqanını aydınlattı. Onıñ aytqanına köre, Aqmescit SİZOsında Bekirovğa kerekli tibbiy yardım kösterilmey.

Daa evel Ukraina Yuqarı Radasınıñ insan aqları vekâletlisi Lüdmila Denisova Qırımda apiske alınğan qırımtatar faali Edem Bekirovnıñ sağlıq vaziyeti kritik, dep bildirgen edi.

Daa evel Bekirov ilk tahqiqat çerçivesinde belgilengen psihologik-psihiatrik ekspertizadan keçti, dep haber etilgen edi.

Qırımda tevqif etilgen qırımtatar faali Edem Bekirov «Qırım birdemligi» areketiniñ koordinatorlarından biri Server Mustafayev ile SİZOda aynı kamerada qala.

Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.

Ukraina Tış işler nazirligi mahkemeniñ qararına qarşı «sert narazılıq» bildirdi.

Bekirovnıñ tuvğanları ayatı telükede olğanını bildirgen edi. Malüm ki, apiske alınğan faal şeker hastası ola. Ayağı kesilgen, muntazam sürette sarğılav yapılmalı.

Yanvarniñ 15-nde Bekirov Aqmescit SİZOsından Semaşko Cumhuriyet hastahanesiniñ endokrinologiya bölügine tibbiy teşkerüvge avuştırılğan edi. Yanvarniñ 18-nde Ukraina Yuqarı Radasınıñ insan aqları vekâletlisi Lüdmila Denisova Bekirov hastahaneden çıqarılıp, Aqmescit SİZOsınıñ mahsus blokuna yollanıldı, dep bildirdi.

XS
SM
MD
LG