Alimler koronavirus hastalığına qarşı aşı yapqanına qadar SARS-CoV-2 koronavirus pandemiyası devam etecek, dep bildirdi Dünya sağlıq teşkilâtınıñ COVID-19 hastalığı meseleleri vekili Devid Nabarro aprelniñ 12-nde. Bu aqta o, NBC News kanalına bildirdi, dep haber ete Azatlıq Radiosı.
Nabarronıñ fikirince, koronavirus hastalığı mevsim grippinden farqlı.
«Bu (COVID-19 – QA) gripp kibi dalğa-dalğa olacağından emin degilmiz. Epimiz bizni qoruycaq aşını alğanına qadar bu virus insanlarnı taqip etecek, dep tüşünemiz», – dedi o.
Dünya sağlıq teşkilâtınıñ vekili qayd etkenine köre, Avropada hastalarnıñ sayısı eksilgenine baqmadan, hastalıq dünya boyunca tarqala, şu sebepten bütün memleketlerniñ belli bir infrastrukturası olmalı.
«Er bir cemiyette hastalarnı qayd etip, olarnı izolâtsiya etecek ve tarqaluvına yol bermeycek belli bir qoruv bar. Böyle imkân er bir memlekette olmalı», – dep qoştı Nabarro.
Johns Hopkins universiteti yanındaki Sistem tedqiqleri merkeziniñ malümatına köre, dünyada tasdıqlanğan COVID-19 hastalarınıñ sayısı 1,8 milliondan çoq oldı, 114 biñ kişi vefat etti. 430 527 insan tüzelip yahşı oldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
