Silâ ve patlayıcı maddelerni qanunsız şekilde saqlağanında qabaatlanğan qırımtatar faali Edem Bekirovnıñ sağlıq vaziyeti Aqmescitteki Semaşko hastahanesinde berilgen yañı ilâclarnı alğan soñ fenalaşa. Bu aqta Bekirovnıñ advokatı İslâm Velilâyev Qırım.Aqiqat mühbirine bildirdi.
İmayeciniñ aytqanına köre, mayısnıñ 14-nde yapılğan teşkerüv neticesinde kardiolog ve endokrinolog Bekirovnıñ alı bir qarar olğanını aytıp, berilgen insulinni arttırmağa tevsiye etti.
«Qan şekeri öyle de yüksek qala – 16 mmol/l (6,5 mmol/l olmaq kerek). Ekimler berilgen insulinni arttırdı ve kün devamında berilgenler toplansa, umumen 50-den ziyade olacaq. O qadar insulin yapılsa da, qan şekeri yüksek qala», – dep tarif ete Velilâyev.
Advokatnıñ bildirgenine köre, Bekirov toqtamağan yürek ağrılarını şikâyet ete. Üçünci stadiya gipertoniyası bar: «Er angi bir areket küçlü nefes darılıqqa ketire».
Yapılğan insulinden sebep faalniñ mide astı bezi arttı ve yandı, küçlü ağrılar bar.
Onı baş ağrısı raatsızlay, bedeni, sol ayağı ve beti şişe. Bundan ğayrı, az areket etken Bekirovnıñ sol ayağı yaramay çalışa.
«Sol ayağında damarları yoq, olarnı yürek ameliyatında qullanğan ediler. Sol ayağında taze trofik yara peyda oldı, onı melemnen süre, amma bazıda kene peyda ola», – dep ayta Velilâyev.
Advokatnıñ aytqanına köre, Bekirov tutuv şaraitlerinden şikâyetçi degil, tek taze ava yetmey, dep ayta.
«Şimdi sıcaqlar başlana, ava yetmey. Kamerada bir pencere 24 saat devamında açıq, amma taze ava yetmey», – dep ayta Velilâyev.
Bekirovnıñ sağlıq vaziyetine esaslanıp, advokat SİZOda tutuluvınen bağlı olmağan er angi sıñırlav tedbirini, hususan ev apsini, talap etmege niyetlene.
İzolâtorda tutuv müddetiniñ uzatılması baqılacaq nevbetteki mahkeme iyünniñ 5-ne belgilendi.
Daa evel mayıs ayında qırımtatar faali Edem Bekirov Aqmescitteki Semaşko hastahanesine teşkerüvge çıqarılğan edi.
Aprelniñ 26-nda Rusiye kontrolindeki Qırım Yuqarı mahkemesi Bekirovnıñ imayesi bergen şikâyet arizasını red etti. Edem Bekirov iyünniñ 12-ne qadar SİZOda qalacaq.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
