Aprelniñ 5-6-nda Aqmescitte keçirilecek «Açıq Qırım» sekizinci turistik forumınıñ iştirakçileri arasında Qıtay, İndistan kurort saalarınıñ vekilleri ve qomşu Rusiyeniñ kurort regionlarında çalışqanlar olacaq. Bu aqta Kreml kontrolindeki Qırım malümat nazirligi Qırımnıñ kurort ve turizm naziri Vadim Volçenkonıñ malümatına esaslanıp bildire.
«Forum öz meydançığında İndistan, Qıtay Halq Cumhuriyeti, Rusiye Federatsiyasınıñ kurort regionlarından eyyetlerni, Qırımnıñ şifahane-kurort ve turizm saalarınıñ vekillerini, cemaat teşkilâtları, zenaat birlikleri ve içtimaiy sigorta fondlarını toplaycaq. Baar forumı muvafaqiyetli «yüksek» mevsimniñ strategiyası ve taktikasını ananeviy şekilde azırlay. Forum tedbileri esnas iştirakçilerini kurort mevsimine, turizm saasındaki inkişafnıñ aktual meseleleriniñ al etilmesine azırlay», – dep qayd etti o.
Qırım akimiyetiniñ qayd etkenine köre, «Açıq Qırım» forumı «Rusiyeniñ bütün regionlarında kurort-turizm saasınıñ vekillerine tecribe, fikir paylaşmaq ve strategik plan yapmaq içün bir meydançıq ola».
Yarımadanıñ Rusiye akimiyeti çetel vatandaşlarını Qırımğa davet etip, onıñ ilhaqını qanunlaştırmağa tırışa.
Ukraina Tış işler nazirliginiñ qayd etkenine köre, çetel siyasetçileriniñ Qırım ziyaretleri resmiy degil. Ukraina nazirligi 2016 senesi iyül ayında muracaat derc etip, çetel vatandaşlarını ve vatandaşlıqsız şahıslarnı Qırımğa qanunsız ziyaretlerden vazgeçmege çağırdı.
