Çarşenbe künü, avgustnıñ 18-nde, Kyivdeki «Qırım evinde» alman ressamı Morits Küstnerniñ fotokitabı taqdim etildi ve «Silence is the Sound of Fear – Qırımdaki vaziyet fotoperspektivası ve sakinleriniñ er künü» munaqaşası oldı.
«Qırım evinde» açılğan sergiden soñ soñki yedi yılda işğal etilgen yarımadanıñ şimdiki vaziyetine dair munaqaşa başladı.
«Fotoressam Morits Küstner beş yıl devamında, 2015 senesinden 2019 senesine qadar, Qırım ve qırımtatarlarnıñ ayatında olğan deñişmelerni qayd etti. Küstner şahsiy ayat, köçüv, ümüt, tirenüv ve yañı başlanğıçlar aqqında ikâye etken teren manalı metinler ve fotoresimler azırladı», – dep bildirdi teşkilâtçılar.
Daa evel berilgen malümatqa köre, Kyivde «Qırım. Yaz mevsimi: bizden alınamaycaqlar» ekspozitsiyası açıldı, onıñ çerçivesinde qırımlılarğa işğal altındaki Qırım aqqında hatırlatqan «eserler» taqdim etildi. Eksponatlar arasında qırımlı ukrain rejissöri, eski siyasiy mabüs Oleg Sentsov, Ukraina Tış işler naziriniñ birinci muavini Emine Ceppar, qırımlı mabüslerniñ advokatı Lilâ Gemeci ve digerleri bergen şeyler bar edi.
Kyiv tarih müzeyinde Kremlniñ qırımlı mabüslerine bağışlanğan CRIMEA is HERE sergisi taqdim etildi.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
