«DNR» qanunsız qurulğa silâlı birleşmesiniñ aydutları ve Rusiye arbiy mühbirleri cumaertesi künü Rusiye ordusı Harkiv vilâyetindeki İzüm şeerinden çıqtı, dep bildirdi.
Bu aqta sahte «DNR» malümat naziriniñ birinci muavini Daniil Bezsonov Telegram kanalında yazdı.
«İzümden ketkenler, Harkiv yönelişinde bir qaç diger mesken yerinden kibi. Ebet, bu yaramay. Ebet, yüksek komandanlıq yapqan hatalarnıñ neticesi. Amma gizli manalar qıdırmağa kerekmey. Añlaşma ya da satqınlıq degil. Bilgenimiz kibi cenkleşemiz», – dep yazdı Bezsonov.
Malümatnı arbiy mühbirler Aleksandr Kots ve Yevgeniy Poddubnıy da tasdıqladılar, dep qayd ete RBK Rusiye neşiri. Poddubnıy komandanlıqnıñ bu vaziyette çekilüv qararını doğru dep adlandırdı. Onıñ aytqanına köre, İzümde Rusiye ordusınıñ sarıp alınması «felâket olur edi».
Kots Rusiye ordusı tek İzümden degil, Kupyansktan ve Balakliyadan çıqa, dep yazdı. Ordunıñ Kupyansktan qısmen çekilgenini Poddubnıy da bildirgen edi.
Ukrayına Silâlı quvetleriniñ 25-inci ayrı Seçeslav ava-desant brigadasınıñ askerleri İzüm çetinde çıqarılğan videonı içtimaiy ağlarda paylaştı.
Cumaertesi künü Ukrayına ordusı İzüm, Kupyansknı ve Donetsk vilâyetindeki Limannı aldı, dep haber etildi. Bu aqta Rusiyege qoltutqan Telegram kanalları ve Ukrayına menbaları yazdı.
Ukrayına Silâlı quvetleriniñ Kupyansknı almasını Harkiv vilâyetiniñ memuriyet yolbaşçısı mesleatçısı Natalâ Popova tasdıqladı.
Ukrayına Silâlı quvetleri mahsus bölüginiñ Telegram kanalında Kupyansknıñ ilk fotoresimleri peyda oldı. Ukrayına komandanlığı Kupyansk azat etilgenini resmiy şekilde daa bildirmedi.
Ukrayına cenübi Mudafaa Quvetleriniñ Birleşken koordinatsion matbuat hızmetiniñ reberi Natalâ Ğumenük cumaertesi telemarafon vaqtında Ukrayına tek Harkiv vilâyetinde degil, cenüpte de muvafaqiyetli qarşı ücüm kerçekleştire, dep haber etti. «Ordumız cenübiy cebede ekiden bir qaç on kilometrge qadar çeşit yerlerde ileriley», – dep ayttı o.
Rusiye Mudafaa nazirligi Balakliya ve İzüm rayonlarında ordusı «ğayrıdan gruppalandı», dep ilân etti. Müessise spikeri İgor Konaşenkov «Donetsk yönelişinde quvetleriniñ arttırıluvı» aqqında ayttı.
Rusiye fevralniñ 24-nde Ukrayınağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayınadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayınanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayınanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
