Türkiye Tış işler nazirligi qırımtatar ve çerkes sürgünleriniñ yılına beyanat derc etti. Bu beyanatı Türkiye Tış işler nazirligi saytında derc etildi.
"Qırımtatar halqı 82 yıl evel bugün (mayısnıñ 18-nde) ana vatanlarından zornen çıqarıldı. 1944 sürgüninde yüz biñlernen qırımtatarı çeşit memleketlerdeki iş lagerlerine sürgün etildi, bir çoqu oğrağan vaziyetler neticesinde can bergen edi. Uzun yıllar devamında qardaş qırımtatar halqı vatanları Qırım yarımadasına qaytamağan edi. Tamır qırımtatar halqınıñ horluqları yarımadanıñ qanunsız ilhaqınen daa da arttı", – dep aytıla Tış işler nazirliginiñ beyanatında.
Qayd etilgenine köre, Türkiye qırımtatarlarnıñ milliy kimlik, til ve medeniyetini saqlamağa yardım etecek, telükesizlik ve amanlıqlarını temin etmege tırışacaq.
Türkiye Tış işler nazirligi 162 yıl evelsi mayısnıñ 21-nde olğan Çerkes sürgünini de hatırladı. Bu gumanitar facia Kavkaz halqlarını ağır şaraitlerde vatanlarını terk etmege mecbur etti, Kavkaz halqları büyük ğayıplar ve horluqlar kördi.
"Qırımtatarlarnıñ ve Kavkaznıñ qardaş halqlarınıñ zorluqlarını paylaşıp, can bergelerni ürmet ve rahmetnen añamız", – dep aytıla Tış işler nazirliginiñ beyanatında.