Rusiyeniñ akimiyetke qoltutqan kütleviy haber vastalarına seferberlik aqqında er angi malümat paylaşmağa yasaq etildi. Rusiye Devlet Duması ya da Federatsiya şurasından kelgen haberler bile yasaq altında. Bu gizli qarar Rusiye prezidentiniñ memuriyetinden keldi. Bu aqta The Moscow Times kütleviy haber vastalarındaki eki menbağa esaslanıp yaza.
«Bundan evel em şimdiki seferberlik, em ola bilecek stsenariy ve tahminler aqqında yazmağa imkânımız bar edi. Şimdi bütün tahminler toqtatıldı. Talapta Rusiye Federatsiyasınıñ Devlet Duma deputatı ya da senator yapqan beyanatlarnı bile aydınlatmağa olmay, dep aytıla», – dep bildirdi neşirniñ menbası.
Dekabrniñ 21-nde Rusiye mudafaa naziri Sergey Şoygu Rusiye Silâlı quvetleriniñ sayısını 1,5 millionğa qadar arttırmağa teklif etti. Daa tahminen 350 biñ insannı orduğa yollamağa isteyler, demek. Şoygu bu adım «Rusiye Federatsiyasınıñ arbiy telükesizligini temin etecek vazifelerni kefil etmek içün» kerek, dep ayttı. Bundan ğayrı, Rusiye naziri askerlikke alınacaqlarnıñ yaşını 18 yaştan 21-ge qadar arttırmağa, eñ keç ise 30 yaşına qadar askerlikke almağa teklif etti.
Rusiyedeki seferberlik sentâbrniñ 21-nde başlandı. Mudafaa naziri Sergey Şoygu Ukrayınadaki cenkte iştirak etmek içün 300 biñge qadar insan seferber etilecek, dep ayttı. Oktâbrniñ 31-nde Rusiye Mudafaa nazirligi «qısmiy seferberlik tedbirleri» ve celpname berilüvi yekünlendi, dep bildirdi. Rusiye prezidenti Vladimir Putin seferberlikni toqtatuv fermanını imzalamadı, çünki «uquqçılarnen aqıl tanıştı» ve «böyle vesiqa kerekmey» eken. Aq qorçalayıcılar seferberlik bitkenine dair buyruqnıñ derc etilmemesi Rusiye Mudafaa nazirligine kene asker almağa imkân bere, dep qayd etti.
Sentâbrniñ 21-nde Rusiyede ilân etilgen «qısmiy» seferberlikten soñ Qırım ve Aqyarnıñ Rusiye akimiyeti askerlikke aluv komissiyaları aqqında bildirdi. Aq qorçalayıcılarnıñ malümatına köre, celpnameler bir qaç biñ qırımlığa keldi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
