Qırımtatar Milliy Meclisiniñ reis muavini, Ukrayına halq deputatı Ahtem Çiygoz Rusiyeniñ Qırım işğalinden sekiz yıl keçken soñ Ukrayınağa sadıq qalğan bir çoq kişi şimdi Qırım yarımadasınıñ arbiy obyektlerinde olğan patlavlarnı «qutlay», dep ayttı.
«Qırımda devamını bekleyler. Bu añlaşıla. Sekiz yıldan berli sert bir işğalde bulunalar, terrorist devlet bar, bu terrornı insanlar daa sekiz yıl evelsi is etti, dünya ise bunı endi-endi añlap başlay, Putin kibi bir canavar ve terror devleti olğan Rusiyenen işleri bar»,– dep ayttı Çiygoz Azatlıq Radiosına.
«(Telükege – QA) baqmadan insanlar Qırımda qayd eteler. Ve bizim vazifemiz – anda, Qırımda vatandaşlarımıznıñ quvançını devam ettirmek. Urmağa devam etmeli, anda urulacaq şey bar. Bunı yapmaq kerek», – dep ayttı halq deputatı «Azatlıq Live» yayınında.
Çiygoznıñ aytqanına köre, arbiy obyektlerde patlavlar işğal etilgen Qırımda 2014 senesinden soñ yarımadağa kelgenlerniñ telâşını ve stabilsizlik duyğusını quvetleştire ve şimdi olar, onıñ aytqanına köre, «Qırımnı terk etmey, andan qaça».
«Sekiz yıl devamında (Kreml tayin etken Qırım yolbaşçısı Sergey) Aksenov Qırımda kurort mevsimleri bar ve er şey yahşı, dep köstermege tırıştı. İşğal çoq devam etecek ve begenmeseñiz, dayanacaqsıñız, dep ayttılar, Qırımğa suv da kelecek, dep ayttılar, şimdi ise Qırım kurort ve agrar region olaraq emiyetini, incili yarımada olaraq da emiyetini coydı», – dedi Çiygoz.
«Kommersant» Rusiye neşiri yerli sakinlerniñ malümatına esaslanıp, Aqmescit rayonınıñ Sarabuz (Gvardeyskoye) qasabasında Rusiye arbiy aerodromında patlavlar aqqında bildirdi.
Rusiye Mudafaa nazirligi Sarabuzdaki arbiy uçaq alanında patlavlar olğanını resmiy şekilde daa tasdıqlamadı.
Avgustnıñ 16-nda saba işğal etilgen Qırımnıñ Canköy rayonında patlavlar oldı. Silâ anbarları, transformator alt stantsiyasında patlavlar ve demir yolnıñ zarar körgeni aqqında haber etildi.
Rusiye akimiyeti Canköy rayonınıñ Qalay köyünden 3 biñden çoq sakin tahliye etildi, dep bildirdi.
Daa evel berilgen malümatqa köre, Rusiye Mudafaa nazirligi Qırımnıñ şimalinde olğanlarnı «diversiya» dep adlandırdı. Qırımda cinaiy iş açıldı. Şübheli ya da tutulğanlar aqqında malümat berilmey.
Qırımnıñ Rusiye yolbaşçısınıñ mesleatçısı Oleg Krüçkov Qırımdaki patlavlarnı «terakt» dep adlandırdı.
The New York Times neşri yüksek rutbeli Ukrayına memurına atfı etip, işğal etilgen Qırımnıñ Canköy civarındaki patlavlarğa «elit ukrayin bölüginiñ» alâqası bar, dep bildirdi. Neşirniñ qayd etkenine köre, memur adı gizli olğanını istegen.
Avgustnıñ 9-nda Saq rayonınıñ Novofedirivka qasabasınıñ arbiy uçaq alanında patlavlar oldı. Rusiye akimiyeti «yaqın evlerden» tahminen 30 kişi tahliye etildi, dep bildirdi. 60-tan çoq mesken ev zarar kördi.
Rusiye Mudafaa nazirligi Novofedirivkada (Saq) arbiy uçaq alanında olğan patlavlarnıñ sebebi «bir qaç aviatsiya silâsınıñ detonatsiyası» oldı, dep bildire. «İnterfaks» Rusiye neşiri Rusiye Federatsiyasınıñ Mudafaa nazirligindeki menbasına esaslanıp haber etkenine köre, müessise patlavlarnıñ esas sebebi olaraq «yanğın telükesizligi qaideleriniñ bozuluvını» saya.
Ukrayına akimiyeti ve arbiyleri Rusiye işğal etken Qırımdaki patlavlardan mesüliyetini tanımadı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
