Saba Harkivge açılğan ateş neticesinde avgustnıñ 15-nde yaralanğanlarnıñ sayısı beşke arttı, dep bildirdi Harkiv vilâyeti arbiy memuriyetiniñ yolbaşçısı Oleg Sinegubov.
«Vilâyetniñ Acele tibbiy yardım merkeziniñ malümatına köre, dört insan hastahanege alındı, ekisi – ağır alda. Bir kişige adise yerinde yardım kösterildi», – dep bildirdi o.
Sinegubov ekimler ve qurtarıcılar ücüm yerlerinde çalışmağa devam ete, dep qoştı.
Harkivniñ şeer yolbaşçısı İgor Terehov bildirgenine köre, Rusiye ordusı şeerniñ Saltov rayonına ateş açtı.
Harkiv ve vilâyetniñ mesken yerleri er kün Rusiye tarafından ateş altına oğratıla. Avgustnıñ 7-nde Harkiv vilâyetiniñ prokuraturası Rusiye istilâsı sebebinden vilâyette 1000-den çoq vatandaş, 50-si bala elâk oldı, yaralanğanlarnıñ sayısı eki qat ziyade, dep bildirdi.
Bir çoq delilge baqmadan, Moskva Ukrayınada vatandaşlarğa ücüm etkenini inkâr ete.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
