Link açıqlığı

Saatnıñ esas haberi

Qırımda Rusiye quvetçileri 20 yaşında qırımtatarını hırsızladı – Çubarov


Refat Çubarov
Refat Çubarov

Esas Ukrayınadan Qırımğa kirgende ğayıp olğan 20 yaşında Appaz Kurtametten 22 künden berli haber yoq. Bu aqta Qırımtatar Milliy Meclisiniñ reisi Refat Çubarov Facebookta bildirdi.

Onıñ malümatına köre, 2022 senesi iyülniñ 23-nde Kurtamet Herson vilâyeti Ğeniçesk rayonınıñ Novooleksiyıvka qasabasından işğal etilgen Qırımğa soy-soplarına ketti. Berilgen malümatqa köre, o, Rusiye tarafından kontrol etilgen «Çonğar» keçiş noqtasına kelip çıqtı. Soñra soy-sopları bağlanıp olamadı.

Çubarovnıñ tarif etkenine köre, iyülniñ 24-nde Appaz Kurtametniñ anasına kimligi belli olmağan kişi telefon etip, Appaznıñ ricası bar, oğlu «Çonğar» keçiş noqtasında vesiqaları teşkerilgende tutuldı, dep haber etti.

«Appaz Kurtametniñ anası oğlunı tapmağa tırışsa da, bir netice olmadı. Appaznıñ anası alğan malümat bugün pek şübheli ola. Resmiy olmağan çeşit malümatqa köre, Appaz Aqmescit SİZOsında tutula, amma SİZO memuriyetine yapılğan resmiy muracaatlarğa böyle şahıs yoq dep cevap berile», – dep bildirdi Çubarov.

Onıñ aytqanına, Qırımdaki Rusiye FSB idaresi de Appaz Kurtametniñ ğayıp olmasına alâqası bar olğanını inkâr ete.

«Appaz Kurtametni qıdırğanda elde etken bir çoq malümatnıñ tafsilâtlarını aytmayıp, Ukrayına vatandaşı, 20 yaşında Appaz Kurtamet 2022 senesi iyülniñ 23-nde «Çonğar» keçiş noqtasında tutuldı ve 2022 senesi iyülniñ 24-nden berli Rusiye Federatsiyasınıñ FSBsi tarafından qanunsız tutulğanını bildirmek içün sebebimiz bar», – dep bildirdi Çubarov.

Avgustnıñ 12-nde Appaz Kurtametniñ tuvğanları Qırımnıñ Rusiye polisine ariza berdi.

Rusiye quvetçileri qırımtatarı tutulğanını resmiy şekilde bildirmedi.

Aq qorçalayıcınıñ malümatına köre, Rusiyeniñ Ukrayınağa qarşı büyük ücümi başlağanından Rusiye quvetçileri işğal etilgen topraqlarnıñ sakinlerini kütleviy şekilde tutalar. Bir qısmı işğal altındaki Qırımğa çıqarıla.

Aprel ayında Herson sakini, qırımtatarı Arsen İbraimov Aqmescitte «Noman Çelebicihan qırımtatar göñülli batalyonında» iştirak etkeninde qabaatlanıp 2 ayğa tutuldı.

İyülniñ 29-nda Qırımdaki Rusiye mahkemesi Ukrayına Silâlı deñiz quvetleriniñ sabıq zabiti Oleksiy Kiselev içün sıñırlav tedbirini belgilep, onı Aqmescit SİZOsına 2 ayğa aldı. Oğlunıñ malümatına köre, Kiselev Geniçeskte hırsızlandı ve Rusiyede terror teşkilâtı olaraq tanılğan «Noman Çelebicihan qırımtatar batalyonında» iştirak etkeninde qabaatlandı.

Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.

XS
SM
MD
LG