Saibi Z arifli maşinanen vulkanizatsiyağa kelgen Rusiye arbiylerine hızmet etmeycegini bildirgen avtoservis «qanunsız inşaat» olaraq yıqıldı, dep bildirdi Qırımnıñ Qurman rayonı Rusiye yolbaşçısı Roman Şantayev.
«Onı yıqqanlar, bazı şeylerni pıçqanlar. Bugün o avtoservis yerinde tek beton meydançıq qaldı. Bozulğan qurucılıq malzemeleri yanında yata», – dep ayttı Şantayev TASS Rusiye devlet agentligine.
Şantayevniñ aytqanına köre, STO yanında diger «qanunsız inşaatlar» bar, olarnı da aynı iş adamı qurğanına oşay. Olarnı da yıqmağa planlaştıralar.
İyün ayında belli olğanına köre, Qırımnıñ Rusiye akimiyeti Qurman rayonınıñ Canğara (Vidnoye) qasabasında Rusiye arbiy tehnikasına hızmet kösterilmegen avtoservisni yıqmağa istey.
İçtimaiy ağlarda olğan videolarğa köre, hadimler Z arfili arbiy yük maşinasını tamir etmege razı olmadı.
Avtoservisniñ saibi Vilen Seytosmanov red cevabı mefküreviy sebeplernen bağlı degil edi, dep ayttı: tamir noqtası yengil maşinalarğa hızmet ete ve ağır ordu yük maşinaları içün uyğun degil.
Qırımnıñ Rusiye parlamentiniñ yolbaşçısı Vladimir Konstantinov avtoservisni yıqmaq qararınıñ mefküreviy temeli bar ve iş adamı Seytosmanovğa «vatanperverlik dersi» olmalı, dep ayttı. O, tamir noqtasınıñ saibine esas Ukrayınağa ketmege tevsiye etti.
Rusiye fevralniñ 24-nde Ukrayınağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayınadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayınanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayınanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
