Rusiye FSBsiniñ hadimleri avgustnıñ 11-nde Qırımnıñ Canköy rayonında qırımtatar faali Enver Kroşnı köteklep işkencege oğrattı. Bu aqta advokatı Emil Kurbedinov «Qırım birdemligine» bildirdi.
İmayeciniñ aytqanına köre, işkence Canköyden Aqmescitke yolda maşinada oldı. Kroşnıñ kötek izleri qaldı, Kurbedinov cinaiy dava açmağa talap etti.
Kurbedinovnıñ tarif etkenine köre, Nemse Canköy (Blijnegorodskoye) köyünde tintüvden soñ Enver Kroşnı gazelge mindirip, Aqmescitteki Rusiye FSBsiniñ idaresine alıp ketkenler. Aydavcıdan ğayrı maşinada 6 maskalı silâlı insan bar edi. Yolda olardan biri Enver Kroşnıñ cep telefonını kösterip, parol yazmağa teklif etti. Cep telefonı saba – tahqiqat tedbirleri vaqtında Rusiye Federatsiyasınıñ FSB hadimleri tarafından alındı ve müürlendi, dep qayd etti uquqçı.
Advokat Kurbedinovnıñ bildirgenine köre, Rusiye quvetçileri Kroşqa cep telefonınıñ «parolini kirmege» teklif etip, red cevabını alğan soñ aytqanlar: «Yahşıdan añlamasañ, yaramay olacaq».
İmayeciniñ malümatına köre, Kroşnıñ arqasında qırçma qapatıldı, qursaqqa yatqızıldı, qollarını yuqarı köterip, erkekni yerge atıp başladılar. Soñra Kroşnıñ başına quşaq atıldı, ağzı ve burnu nefes alamağanına qadap qapatıldı. İşkence vaqtında telefonnıñ parolini aytmağa talap ettiler, çünki parmaqlarnı cep telefonına tiygizgende bir netice olmadı. Bundan ğayrı, köteklep, ayaqlarına basqanlar. Rusiye FSB idaresine qalğan yolda Kroşnı kene oturtıp, parol yazmağa teklif etkenler ve başına urğanlar.
«FSBge kelgende qollarında qan izlerini, yara, tırnaq yaralarını kördim. Çekesinde sol taraftan gematoma ve şişik kördim. Eñsesinde patlağan kapillârlar, sol ayağında yara ya da çatlağan teriden qan bar edi», – dep tarif etti müvekkiliniñ alını Kurbedinov. Qayd etkenine köre, bu sorğu protokolında bar ve cinayet arizası arbiy tahqiqat komitetine berilecek.
Rusiye quvetçileri işkence aqqında malümatnı resmiy şekilde izaatlamay.
Avgustnıñ 11-nde saba faaller işğal altındaki Qırımda Rusiye quvetçileri qırımtatarlarnıñ evlerini tinte, dep bildirdi. Advokatlarğa kirmege izin berilmedi, bazı yerlerde cep telefonı bağı söndürildi. Altı er adamı – Vilen Temeryanov, Enver Kroş, Seitâya Abbozov, Murat Mustafayev, Edem Bekirov ve Rinat Aliyev Rusiyede yasaqlanğan «Hizb ut-Tahrirde» iştirak etkeninde qabaatlanıp tutuldı.
Ukrayına prezidentiniñ Qırım Muhtar Cumhuriyetindeki temsilciligi qırımtatarlarnıñ evlerinde keçirilgen tintüvlerni takbih etti.
Hatırlatamız, 2018 senesi Rusiye quvetçileri qırımtatar faali Enver Kroşnıñ evini endi tintken edi. O, «ekstremist teşkilâtınıñ propagandası» sebebinden 10 künge apiske alındı.
Advokat Emil Kurbedinovnıñ malümatına köre, 2015 senesi dekabr ayında Rusiye quvetçileri qırımtatar faali Enver Kroşnı elektrik aqımınen işkencege oğratqan edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
