Avgustnıñ 11-nde saba işğal etilgen Qırımda tintüvlerden sor Rusiye quvetçileri tarafından tutulğan Enver Kroş, Seitâi Abbozov, Edem Bekirov, Murat Mustafayev, Rinat Aliyev Qırımdaki Rusiye FSB İdaresine ketirildi, soñra olarnı Aqmescit SİZOsına yollaycaqlar, dep haber ete «Qırım birdemligi» cemaat birleşmesi.
«Altı qırımtatarı tintüvlerden soñ mahsus hızmetlerniñ hadimleri tarafından Aqmescit şeerindeki FSB idaresine ketirildi. Tahqiqat tedbirleri yekünlengen soñ olarnı vaqtınca tutuv izolâtorına yollaycaqlar, yarınki mahkemege qadar olar anda qalacaq. Yarın Aqmescitteki Kyiv rayon mahkemesi sıñırlav müddetlerini belgileycek», – dep aytıla haberde.
Al-azırda Rusiye quvetçileri resmiy bir izaat bermedi.
Hatırlatamız, avgustnıñ 11-nde saba faaller işğal altındaki Qırımda Rusiye quvetçileri qırımtatarlarnıñ evlerini tinte, dep bildirdi. Rusiye quvet müessiseleri tintüv sebebini aytmadı.
Ukrayına prezidentiniñ Qırım Muhtar Cumhuriyetindeki temsilciligi qırımtatarlarnıñ evlerinde keçirilgen tintüvlerni takbih etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
