Qırım ve Rusiye kütleviy haber vastaları, telegram kanalları Novofedirivka qasabasında (Saq) uçaq alanında patlavlar oldı, dep bildirdi.
«Vesti Krım» neşiri şaatlarnıñ malümatına esaslanıp, «Novofedirivkadaki arbiy aerodromda patlavlar oldı» dep bildirdi ve adiseniñ foto ve videolarını aydınlattı.
«Mash na volne» telegram kanalı şaatlarnıñ malümatına esaslanıp, «Novofedirivkadaki silâ anbarları ve uçuş şeriti» yana, dep bildire. Neşir video da yayınlay.
«Birinci patlav saat 15:20-de oldı, umumen on patlav aqqında aytıta. Qomşu evler zarar kördi, dep haber etile», – dep aytıla haberde.
Patlav olğanını Qırımnıñ işğalci akimiyetine yaqın «Krıminform» neşiri tasdıqladı.
İşğal altındaki Qırımnıñ Rusiye akimiyeti resmiy izaat bermey.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
