Kreml saytı Rusiye prezidenti Vladimir Putin ve Türkiye prezidenti Recep Tayyip Erdoğan arasında Soçide keçirilgen muzakereler bitti, dep bildirdi.
Berilgen malümatqa köre, taraflar «Akkuyu» atom elektrostantsiyasınıñ quruluvını ve «Türk aqımı» çerçivesinde işbirligini muzakere etti.
«Siziñ ve BM Kâtibiyetiniñ yardımınen Ukrayına zahiresiniñ Qara deñiz limanlarından ketirüv meselesi çezildi. Endi ketirile», – dep bildire Putinniñ Erdoğanğa muracaatını Rusiye prezidentiniñ saytı.
Türkiye prezidentiniñ saytı «Suriye meselesi» ve Türkiye ve Rusiyeniñ «terrorizm ile küreşte birdemligi» aqqında yaza.
Avgustnıñ 5-nde aqşam taraflar Rusiyeniñ Ukrayınağa qarşı cenkini ve onı toqtatuv yollarını muzakere ettilermi aytılmay.
Soçideki körüşüv Türkiye ve Rusiye liderleriniñ bir ay içinde ekinci körüşüvi oldı.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
