Rusiye prezidenti Vladimir Putin avgustnıñ 5-nde Türkiye zenaatdaşı Recep Tayyip Erdoğan ile Soçide körüşecek, bu bir aydan az bir müddet içinde eki liderniñ ekinci körüşüvi olacaq.
Muzakerelerniñ esas mevzuları Rusiyeniñ Ukrayınağa qarşı cenkiniñ toqtatıluvı ve Suriyede Türkiye ücüminiñ istiqbali olacaq. Erdoğan BM vastasınen Qara deñizden Ukrayına zahiresiniñ taşıma añlaşmasına yardım etüvde diplomatik muvafaqiyet qazandı.
Türkiye lideri Kreml başlatqan büyük cenkni toqtatuvda rolüni almaq içün em Ukrayına, em Rusiye ile munasebetlerini qullandı.
Suriyeniñ şimalinde kürt opolçenlerine qarşı Ankaranıñ arbiy istilâsı da kün tertibinde olacaq, dep bildirdi TRT türk devlet telekompaniyası.
Suriyede prezident Başar Asadqa qoltutqan Moskva böyle ücümden vazgeçmege tevsiye etti.
Ankara ABD qoltutqan suriyeli kürtlerniñ opolçenlerine (YPG) terror gruppirovkası dep saya ve yerli isyancılarnen bağlı olğanından şübhelene.
Suriye şimalinde Türkiye ücümi 2019 senesinden berli Washington ve Rusiye yardımınen tizilgen eki ateş toqtatuv añlaşmasından soñ toqtatıldı.
Kremlniñ malümatına köre, kün tertibinde NATO aza memleketi olğan Türkiyege Rusiyege cenk uçucısız cihazlarınıñ satıluvı da bar.
Putin uçucısızlarnı işlep çıqarğan Baykarğa Rusiye ile işbirligini teklif etti. Ukrayına ordusı fevral ayından berli Baykarnıñ Bayraktarlarını Rusiye ordusına qarşı qullana. Baykar baş müdiri Haluk Bayraktar CNNge bergen interyüvğa şirket dronlarnı Rusiyege satmaycaq, dep bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
