Ukrayına prezidentiniñ Qırım Muhtar Cumhuriyetindeki temsilciligi Rusiyeniñ Qırımda Ukrayına vatandaşlarını qoruğan advokatlar Lilâ Gemeci, Rustem Kâmilev ve Nazim Şeyhmambetovnıñ zenaat faaliyetini qanunsız deñiştirmek ıntıluvlarını takbih etti.
«Çeçenistan Cumhuriyetiniñ advokatlar palatası advokatla Lilâ Gemeci, Rustem Kâmilev ve Nazim Şeyhmambetovnı advokat faaliyeti aqqından marum etti. Uquqçılar cinaiy davalarda iştirak etip olamay, müvekkillerini qorçalap olamay, mahkemeden evelki tahqiqatta ve mahkemelerde temsil etip olamay. Bundan ğayrı, bir yıl devamında advokat statusını tekrar almaq içün imtian bermege aqları yoq. Nazim Şeyhmambetovnıñ aytqanına köre, bu qarar Çeçenistan Cumhuriyetindeki adliye nazirliginiñ idaresi advokatlar çalışqan advokatlar palatasına bergen iddiası esasında qabul etildi», – dep aytıla haberde.
Qayd etilgenine köre, uquqçılarnıñ advokat statusı müşteriniñ şikâyetinen degil, devlet organınıñ talabınen toqtatıldı.
«Qarar taraflarnıñ toplaşuvdan haberi olmağanda alındı. Meselâ, Lilâ Gemecige tasnif komissiyasınıñ toplaşuvından bir kün ögüne haber etildi. Advokatlar advokat statusından marum qaldıruv qanunsız qararına ve eñ az bir yıl zenaat faaliyetinen oğraşuv aqqından marum etilgenlerine qarşı şikâyetler azırlay. Şeyhmambetovnıñ aytqanına köre, Qırım işğali devamında üç advokat bir kereden ve birden zenaat statuslarından marum qaldırılğan ilk sefer oldı. Bu Rusiye tarafından siyasiy taqip alâmeti ve imayecilerniñ zenaat faaliyetine mania oluv ola», – dep bildirdi Ukrayına prezidentiniñ temsilciligi.
Qayd etilgenine köre, Ukrayına vatandaşlarını qoruğan mustaqil advokatlarğa basqı ve taqip ilk yıl degil ve Rusiye Ukrayınağa bu yıl fevral ayında büyük istilâ etken soñ quvetleşti.
«Advokatlar Emil Kurbedinov, Edem Semedlâyev, Ayder Azamatov, Emine Avamileva, Nazim Şeyhmambetovnıñ tutuluvı ve qanunsız apis cezaları. Emil Kurbedinovnıñ advokat ofisine ücüm etüv, Lilâ Gemecini izinsiz aktsiyalarnı keçirüv yasağı aqqında tenbilev, müvekkillerge kirsetmeme, işğalci mediada mustaqil advokatlarğa qarşı ayırım kampaniyaları ve diger basqı şekilleri», – dep aytıla haberde.
Ukrayına prezidentiniñ Qırım Muhtar Cumhuriyetindeki temsilciligi Rusiyeden «mustaqil advokatlarğa qarşı repressiyalarnı ve zenaat faaliyetlerine mania şekillerini acele toqtatmasını» talap etti.
Anda halqara toplulıq ve advokat toplulığını cevap berip, işğal altındaki Qırımda advokatlarnıñ işine mania etüvni takbih etmege çağırdılar.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
